2 polis gipaak, gisagpa sa babayeng nagmaoy

CEBU, Philippines - Napaakan ug nasagpaan ang duha ka mga polis sa usa ka babayeng hubog nga giingong nagmaoy nga ilang gihaw-as gikan sa dagat tungod sa peligrong malumos diha sa usa ka beach resort sa barangay Poblacion, dakbayan sa Talisay niadtong Huwebes sa gabii.

Apan ang maong hitabo wala ma-blotter sa kapolisan ug wala usab makuha sa kapolisan ang pangalan sa maong babaye ug sa kauban niini tungod kay gipasaylo sila sa mga polis.

Ang mga naninda ug residente diha sa lugar nga nahitaboan nga nahinabi sa Banat News kagahapon sa buntag mibutyag nga usa ka langyaw ang midangop sa police station ug nangayo og panabang tungod kay nagtuo kining nalumos ang maong babaye.

Sila si PO1 Jose Emmanuel Diluvio ug PO1 Raul Wamar kinsa parehong gi-augment karon diha sa Talisay City Police Station maoy miresponde apan sila hinuoy gipahimungtan sa maong babaye. Si Wamar gipaak sa tuong bukton nga nagbilin og lakra sa ngipon samtang nawingig sa sagpa ang nawong ni Diluvio nga binuhatan gihapon sa maong wala mailhing babaye.

Ang duha mibutyag sa Banat News nga mga alas 7:00 sa gabii niadtong Huwebes usa ka langyaw ang mianha sa police station ug mipahibalong adunay babayeng daw nalumos sa dagat.

Tungod kay ngitngit giiwagan og flashlight sa maong langyaw ang dagat apan gilabay niini og balas ang mga polis, ang mga estambay na maoy gipatabang sa mga polis pagkuha kaniya gikan sa dagat nga nagsul-ob lang og panty ug bra.

Matud ni Diluvio nga dagku kaayo ang bawod niadtong higayona maong naghuna-huna silang luwason ang maong babaye nga nagpautaw-utaw ug nagpalumoslumos sa lawom na nga bahin sa dagat.

Human gipailis ug gidala sa police station nagmagahi ang duha pagtug-an sa ilang pangalan ug nag-wild ang hubog nga babaye kinsa gikatahong ilang giposasan.

Hinuon human sa pipila ka oras ug pagpakiluoy sa kauban sa hubog nga babaye gipasaylo ang duha ug gipapauli.

Nasayran nga ang nahisgutang nagmaoy taga barangay Guadalupe sa dakbayan sa Sugbo ug ang kauban niini minyo sa usa ka langyaw ug diha na magpuyo sa dakbayan sa Talisay. (BANATNEWS)