10 mil ang mobantay sa Sinulog Grand Parade

CEBU, Philippines - Kapin sa 10,000 ka mga polis, sundalo, kadete, civilian volunteers ug fraternity members ang mobantay sa Sinulog Grand Parade aron pagsiguro sa kahapsay ug kalinaw sa maong kalihokan.           

Miapelar usab ang kadagkuan sa kapulisan sa Police Regional Office-7 ingon man ang Cebu City Police Office (CCPO) ngadto sa mga dagkong kompaniya nga mosalmot sa Float Category sa Sinulog Grand Parade karung petsa 15 niining buwana nga dili mangitsa sa ilang mga produkto aron malikayan ang stampede sa bagang duot sa katawhang mosaksi sa maong kalihokan.

Kini maoy gipahibawo ni Sr. Supt. Louie Oppus, Deputy Regional Director for Operation (DRDO) sa PRO-7 human sa pagpatawag niini og final conference ngadto sa tanang security committee nga naglangkob sa kapulisan sa dakbayan sa Sugbu, Bureau of Fire Protection (BFP), Department of Health (DOH) ug Regional Epidemiology and Surveillance Unit (RESU)-7, Armed Forces of the Philippines (AFP) Central Command.

Matud ni Oppus delikado kaayo sa disgrasya kun mangitsa og produkto ang nagsakay sa mga dagkong floats ug aron paglikay ilaha kining awhagon nga dili nalang buhaton.

Lakip sa ilang hangyuon ang buhatan sa Air Transportation Office (ATO) sa pagdili sa mga helicopters ug abyon nga moagi sa tungod sa carousel route ingon man sa Abellana Sports Center nga managak og confetti aron dili mabalda ang mga tawo o kaha ang mga dancers nga nanayaw.

Samtang gipahibawo usab ni Oppus nga pormal nang giaprobahan ni PNP Chief Nicanor Bartolome ang gunban dinhi sa dakbayan sa Sugbu.

Matud pa niya nga ilang nadawat ang approval ni Bartolome kagahapon sa buntag ug ang gunban magsugod sa petsa 5 ug matapos sa petsa 25 sa tungang gabii karung buwana.

Tungod niini ang mga gun holders dili na tugotang makadala sa ilang armas gawas sa ilang balay ug kun madakpan sila sa kapulisan mag-atubang sila og kasong illegal possession of firearms.

Bisan ang mga polis ug sundalo nga dili mag-uniporme kinahanglang aduna gyud kini specific patrol order nianang adlawa sa pagdala sa ilang armas ug assignment.

Ang kapulisan sa tibuok probinsya sa Sugbu lakip na ang dakbayan sa Mandaue ug Lapulapu gipaubos sa full alert sugod karung petsa 9 ngadto na sa petsa 16 liwas sa Sinulog, hightened alert usab sa mga kasikbit nga probinsya.

Karung Domingo sa buntag makigtagbo si Sr. Supt. Melvin Ramon Buenafe hepe sa CCPO ngadto sa tanang civilian volunteers nga moabag sa pagbantay.

Gipadayag ni Buenafe nga moabot sa 10 mil ang tanang mobantay sa Sinulog dala na sa kapulisan, AFP Central Command, civilian volunteers, lakip na ang mga sakop sa fraternity nga misaad na kanila nga motabang sa pagbantay sa seguridad ug mga tinun-an sa Criminilogy dinhi sa dakbayan sa Sugbu.

Ang mga sundawo ug criminology students maoy tahasan sa crowd control samtang ang kapulisan maoy modumala sa seguridad.Sama sa naandan gidili ang pag-inom daplin sa carousel route ug dunay temporaryong prisohan sa magpabadlong nga ibutang sa rota. (BANATNEWS)