Kapitan ug tanod nangulata'g bata

CEBU, Philippines - Naghubag pa ang liog sa usa ka 16-anyos nga lalaki nga midangop sa sibyaanang DyDD ug mireklamong gitabangan kini og kulata sa kapitan, tanod ug sakop sa Barangay Peacekeeping Action Team (BPAT) ug gihadlok pinaagi sa pagtion kaniya ug pagkablit sa .38 revolver atol sa bespiras sa tinuig nga kapistahan sa ilang barangay.

Ang 16-anyos (pangalan gipugngan) nagpuyo sa barangay Hilantagaan sa Santa Fe unang miduol sa DyDD sa miaging gabii ug nagpatabang pagdangop sa Provincial Social Welfare and Development (PSWD) sa buhatan ni Bise Gobernador Agnes Magpale kagahapon sa buntag aron isumbong ang gidangatan niya sa mga kamot sa mga opisyales sa ilang barangay.

Gitumbok sa biktima nga mikulata kaniya ug sa kaubang menor de edad mao sila si Kapitan Jenor Marabi, Jurel Premacio sakop sa BPAT, Dumon Illustrisimo ug ang anak niining si Tato.

Ang batan-on misaysay nga niadtong Disyembre 17 sa gabii bisperas kadto sa tinuig nga kapistahan sa ilang barangay nahitabo ang pagpangulata dihang kalit siyang gituok sa ginganlan og Tato diha sa gawas sa diskohan.

Matud pa niini nasuko kini nga wala siya mobayad sa P10 nga pulta. Tungatunga sa ilang panag-estorya giingong miabot si Dumon Illustrisimo ug giliab siya niini dayong sukmag sa iyang ilong hinungdan sa pagdugo niini ug sa iyang baba.

Nadugangan ang iyang kasakit dihang giingong miduol si Jurel ug ang kapitan ug gisagpa siya sa nawong ug pagkahuman miibot kini og armas dayon gition kaniya dungan sa pagkablit sa gatilyo apan mikagar ug wala mobuto.

Matud sa biktima ang iyang kauban gikulata usab sa grupo sa kapitan.

Human niadto gidala siya sa barangay hall ug gibalhog sa karsel diin siya gikatahong giusban sa pagkulata ug gidukdok ang iyang ulo sa armas dayon gisukmag siya niini nga dunay gibulibod nga kadena sa kumo sa kapitan hinungdan nga nagsuka siya og dugo.

Sumala pa sa batan-on samtang gihimo kini sa kapitan gipunayan siya og balikas niini og “buang ka!” Dihang sirad-an na ang karsel gipatidpatiran siya pag-usab sa tanod nga si Jurel.

Nianang pagkabuntag gidala siya sa kapitan ngadto sa Santa Fe Police Station aron i-turnover apan didto mireklamo ang bata sa iyang gidangatan sa maong barangay.

Base sa blotter sa Womens and Childrens Protection Desk (WCPD) sa Santa Fe Police station pinaagi ni SPO1 Sheila Illustrisimo, niadtong Disyembre 18 ang biktima mitug-an nga gikulata siya sa upat ka suspetsado hinungdan sa daghang bun-og sa kalawasan sa bata nga naglakip sa liog nga hangtud ning pagsulat sa balita naghubag pa.

Tuyo unta sa kapitan nga bilangguon ang batan-on sa mga polis apan nagdumili si SPO1 Illustrisimo pagsanong niini tungod kay menor pa kini.

Ang biktima nagpakurasyon sa Santa Fe Municipal Health Officer ngadto kang Dr. Rowena Manalili ug base sa medical certificate nakaangkon og bun-og sa liog, tiyan ug uban pang parte sa iyang kalawasan.

Ang biktima mipakita usab sa mga tigbalita sa sinina nga iyang gisuot nianang adlawa nga aduna pay lama sa daghang dugo tungod sa pagkulata kaniya.

Gidugang sa biktima nga ikaduha kadtong higayon nga gidapatan siya sa ilang barangay kapitan.

Ang Banat News misuway sa pagtawag sa cellphone ni Marabi aron kuhaan sa iyang habig kabahin sa alegasyon sa maong batan-on apan dili kini makontak. Apan kagahapon sa report sa Aksyon Bisaya News5, si Marabi mipasangil nga badlungon ang maong batan-on sa ilang barangay ug mihimakak sa pasangil sa maong batan-on nga gikulata nila kini.

Matud pa niini nga wala siya modapat sa maong batan-on tungod kay ang mga tawo diha sa diskohan maoy mikulata niini ug igo ra niya kining gipadala ngadto sa barangay aron dili na makulatahan pa.

Gihimakak usab niya ang mga nigawas nga report nga mitanyag siya og P20 mil nga bayad aron aregluhon ang reklamo sa pamilya sa batan-on.(/EIM)  (BANATNEWS)