2 bus driver positibo sa random drug test

CEBU, Philippines - Gilangkatan og lisensiya ang duha ka drayber sa pampublikong sakyanan nga nasakpang nagpositibo sa kinalit nga random drug testing sa Land Transportation Office (LTO)-7 niadtong naghinangat ang Pasko ug Bag-ong Tuig.

Matud pa ni LTO-7 regional director Raul Aguillus dihang nahinabi sa Banat News moabot og 200 ka mga drayber sa bus pasaheroan gikan sa South Bus Terminal, North Bus Terminal ug mga terminal sa V-hires dinhi sa dakbayan ang gipaubos sa kinalit nga drug testing.

Gisugdan ang random drug testing niadto pang Disyembre 22 ug 23 nga naghinangat ang Pasko ug duha sa mga bus drivers sa South Bus Terminal ang nagpositibo.

Matud ni Aguillus gilangkatan dayun nila sa lisensiya ang maong mga drayber samtang gipaabot ang resulta sa confirmatory test apan di una tugutang makamaneho.

Ang drayber nga makompirmar nga tiggamitan og ilegal nga drugas awtomatikong ma-revoke ang lisensya ug dili sila tugutang makabalik og lukat og lisensya hangtud dili magpa-rehabilitate.

Bisan unsang adlawa magpadayon ang random drug testing sa kadalanan ug sa mga terminals sa mosunod nga mga adlaw sa tuyo sa LTO nga mapitol ang mga adik nga drayber.

Gawas niini ipadayon sab sa LTO-7 ang pagpahigayon og road worthiness test pagtino sa kaluwas sa mga sakyanang mobiyahe nunot usab ning nagsingabot nga Sinulog.

Ang Sinulog sa Sugbu maoy labing dugokon sa mga lokal ug langyaw nga turista matag tuig nga saulogon sa bulan sa Enero.  - BANAT NEWS