Masiao collector sikop

CEBU, Philippines - Mokabat sa P80,000 nga kantidad ang girekomendar nga piyansa sa korte sa usa ka tawo nga nadakpan sa akto sa kapolisan sa pagpangulekta sa ilegal nga sugal nga masiao sa sitio Bantayan, barangay Poblacion, lungsod sa Cordova alas-9 pasado ang takna sa miaging gabii.

Si SPO1 Laurencio Wagwag sa Cordova Police Station miila sa nadakpan nga mao si Reynald Ponteros, 24, taga sitio Cadulang sa barangay Marigondon ug gikatahapan nga kolektor sa masiao.

Matud pa ni Wagwag nga nakadawat og mga taho ilang buhatan labot sa naghitak nga ilegal nga sugal nga masiao sa maong lugar hinungdan nga ilang gipanid-an ang lugar.

Si Ponteros luwan sa usa ka motorsiklo mag-anhaan sa maong dapit sa sayong gabii apan daling mobiya hinungdan sa ilang pagduda. Nianang gabhiuna subli nilang nabantayan si Ponteros ug ning higayona ilaha na kining gisitar.

Dihang girekisa ang iyang gidalang bag nakuha gikan kaniya ang mga tally sheets nga may mga number combinations.

Kasong kalapasan sa Republic Act 9297 kon kalapasan sa illegal numbers game ang gipasaka batok kaniya.  - BANAT NEWS