Mipatay sa negosyante ikiha

CEBU, Philippines - Gikatakdang pasakaan og kasong murder diha sa piskaliya sa dakbayan sa Talisay sa sunod semana ang suspetsadong mipusil sa iyang silingan niadtong Biyernes sa gabii diha sa barangay Bulacao,Talisay.

Kahinumduman nga si Ian Paul Jamili, usa ka negosyante ug residente sa maong dapit ang giulo sa pagpusil sa iyang silingan nga si Dave Bentain Tancinco kinsa padayon pang gipangita sa kapolisan karon.

Si Inspector Hugo Rio Ipong sa pakighinabi niini sa Banat News kagahapon nagkanayon nga tungod sa mga holidays ug padayong hot pursuit operation hinungdan nga wala dayon nila mapasaka ang kaso batok kang Tancinco.

Kahinumduman usab nga ang kapolisan nakadawat og report nga si Tancinco giingong mosurender apan hangtud kagahapon sa buntag wala pa gihapon kini mopatim-aw diha sa Talisay City Police Station.

Matud ni Ipong nga sa ilang nahipos nga report giingong personal nga bangi ang hinungdan sa maong pagpamusil tungod sa panaglalis sa duha kaniadto.  - BANAT NEWS