CEBU, Philippines - Most wanted person sa Central Visayas nga dunay patong sa ulo nga P300,000 ang giingong napusilan apan nakaeskapo gihapon sa kapulisan atol sa pinusilay niadtong Martes sa hapon sa barangay Pamutan, usa ka bukirang lugar dinhi sa dakbayan sa Sugbu.
Si Chief Inspector Bonifacio Garciano,hepe sa Investigation and Detective Management Branch (IDMB) nagkanayon nga ang iyang mga sakop maoy nakaengkuwentro ni Rodrigo Labitad kinsa nag-atubang og daghang kasong pagpatay.
Matud ni Garciano nga si SPO3 Rene Cerna ug PO2 Dirisistomo Bayato maoy nakaengkuwentro kang Labitad pasado alas 2 kagahapon sa hapon apan nakasulod sa kakahuyan ug nakatago si Labitad human sa pipila ka minutos nga sinukliay sa bala.
Usa ka .30 caliber carbine rifle ang nakuha sa kapolisan diha sa gitagoang balay sa suspek. Matud ni Garciano nga si Labitad nasigpatan diha sa maong dapit apan pagkakita niini sa kapolisan mikaratel kini og dagan ug mikuha sa iyang armas ug granada.
“Mokuha unta siya sa iyang carbine mao to giunhan nalang og pusil,” matud ni Garciano ug midugang nga adunay mga lama sa dugo nga nakit-an diha sa lugar nga gituohang iya ni Labitad kay posibleng naigo kini sa mga polis.
Matud niya nga ilang susihon ang tanang tambalanan ug klinika dinhi sa dakbayan ug Metro Cebu nga posibling maoy dangpan ni Labitad aron matambalanan ang iyang samad pinusilan.
Sa iyang hideout, si Garciano nagkanayon nga narekober sa iyang mga sakop ang carbine, tulo ka hand grenade, bonnet, pipila ka sinina ug pipila usab ka mga “habak.”
Niadtong dekada 90, si Labitad maoy gipasanginlang mipatay sa iyang silingan diha sa dakbayan sa Talisay ug duna pay gidudahang laing mga kaso sa pagpatay nga gipasangil kaniya. - BANAT NEWS