CEBU, Philippines - Gipusposan og guod nga kawayan ang usa ka tigulang babaye nga gituohang nalisoan sa maayong pangisip ug napalgang patay sa miaging gabii diha sa sitio Puntod Communal, Alaska sa barangay Mambaling siyudad sa Sugbu sa miaging gabii.
Giila sa Homicide Section ang biktima nga mao si Diodesa Domen Estrellosa, 55, nagpuyo sa maong lugar kansang patay’ng lawas nakit-an sa usa ka residente nga giilang si Dinalyn Sarbido, 29.
Ang biktima nagkadugo sa ulo ug dunay samad sa ulo ug nawong dihang nakaplagan apan sa pagsusi sa mga awtoridad patay na kini. Usa ka guod nga kawayan ang nakuha sa mga imbestigador diha sa crime scene nga gituohang maoy gigamit sa wala pa mailhing kriminal sa pagpuspos sa biktima.
Si Rizalino Buaya, 36, usa ka traysikad drayber ug pag-umangkon sa biktima miasoy sa kapulisan nga dugay nang may deperensya sa pangisip ang iyang iyaan sulod na sa 20 ka mga tuig. (BANAT NEWS)