Duha 'kawatan' nadakpan

CEBU, Philippines - Duha ka mga lalaking gipasanginlang tulisan ug kawatan nga magsakay og awtong kinawat ang nadakpan sa kapulisan human maapsi atol sa ginukdanay alas-10 pasado kagahapon sa buntag sa usa ka kan-anan diha sa eskina sa Juana Osmeña ug Escario St., sa barangay Capitol Site sa dakbayan sa Sugbu.

Sila si Edward Tevez, taga San Vicente Village sa barangay Subangdako sa dakbayan sa Mandaue ug Eric Reyes Borja alias ‘Kano’, 29, taga Ayala Access Road sa barangay Kamputhaw ang nadakpan sa kapulisan.

Sa wala pa madakpi ang duha gialarma na sa kapolisan ang ilang gisakyan nga Toyota Vios may plakang PII-399 kolor silver sa miaging gabii human mi-check in ang duha sa usa ka bag-ong hotel sa may dalan A.S. Fortuna sa dakbayan sa Mandaue ug ilang gikuha ang 32-inches TV flat screen sa maong hotel.

Nianang alas-5 sa hapon ang duha usab ang gipasanginlang mikuha sa usa ka laptop sa usa ka auto shop diha sa barangay Tisa nga gipanag-iya sa usa ka Richard Cupin ug sa pagsibat sa mga suspek nakuha sa trabahante ni Cupin nga si Ronnie Rabanas ang plate number sa gisakyan sa duha.

Kagahapon sa buntag sila si PO2 Lou Pagara, PO2 Erwin Piquero sakop sa Homicide Section ug PO2 Romil Tanggol sakop sa Mobile Patrol Car nag-uban sa usa ka patrol car ug nakabantay sa maong awto nga ilang gipangita niana pang milabay’ng gabii diha sa uptown area hinungdan nga ilaha kining gisundan.

Si Pagara nga nahinabi sa Banat News miingon nga human nila makompirmar ang plaka gikan sa base control sa MPG ilaha na kining gisundan apan nakamatikod ang mga sakay sa awto ug bisan one way mi-left turn kini sa Mango Avenue ug mipasirit hinungdan nga miarangkada ang nagsunod nga patrolcar sa paggukod.

Bisan nabiyaan sila sa awto adunay mga drayber sa taksi nga nakahatag kanila og direksyon nga didto kini milahos sa usa ka kan-anan sa Escario ug didto nila maabti ang duha sa ilawom sa bar tender.

Si Jacky Mancao, waitress sa Ninoy’s Payag miingon nga nakalitan siya dihang kalit mipasok ang duha ka lalaki kay buot silang manago kay dunay gustong mopusil kanila.

Apan dihang naabot ang mga polis giposasan dayon ang duha ug sa pagsusi sa ilang sakyanan nakuha ang duha ka .45 nga kalibre sa armas dunay upat ka magazines nga puno sa buhing bala ug laing duha ka extra nga bala sa .45 ug usa ka .357 revolver, dunay upat ka buhing bala, mga identification cards (I.D) gikan sa nagkalain-laing mga pangalan sa mga babaye nga gituohang ilang nabiktima sa tulis, nagkalain-laing klase sa yawe sa hotel, drug paraphernalia, ug pinutos sa gituohang shabu ug uban pa.

Si Sr. Supt. Melvin Ramon Buenafe, hepe sa Cebu City Police Office (CCPO) nga maoy nangulo sa pag-inspeksyon sa baggage compartment sa awto ug nakita usab nga duna kini daghang mga senina, sapatos nga gituohang ilang kinawat sulod sa hotel.

Nasuta usab sa kapulisan nga kinawat ang maong awto gikan sa Makati City. Si Reyes nabilanggo na niadtong tuig 2008 tungod sa ilegal drugas apan na-dismiss ang kaso.

Ang duha usab maoy gipasanginlang namusil og airsoft guns sa mga mahuyang diha sa dalan Mango Avenue pipila ka bulan na ang nakalabay ug ning uwahi niadtong Disyembre 24 diha sa Ayala Access Road.

Ang duha nagdumili paghatag og pamahayag mahitungod sa mga pasangil kanila dihang gikuhaan og pamahayag sa mga sakop sa media apan si Reyes nangayo og pasaylo sa iyang mga ginikanan sa nahimong salaod.

Matud ni Buenafe nga ang modus sa duha ka mga suspek mo-check in sa mga hotel unya mangawat sa kasikbit nga kwarto. Gisusi na sa CCPO ang mga hotel nga posibleng nabiktima sa duha. Ang duha nakaangkon og garas sa ilang mga nawong human sila gipahapa sa semento dihang giposasan sila kagahapon. (BANAT NEWS)