Pag-ihap sa balota sa Compostela karong buwana

CEBU, Philippines - Gibutyag kagahapon ni manlalaban Marco Castillano, Chairman sa Commission on Elections (COMELEC) 7 nga may kalagmitang maihap na   pag-usab ang mga balota sa miaging election sa lungsod sa Compostela.

Matud pa ni Castillano nga nagpaabot nalang sila sa ruling gikan sa Comelec En Banc sa kaulohan.

Mipasabot si Castillano nga nalangay ang pagsugod sa canvassing tungod kay nagpaabot pa sila sa ilang giduso nga memorandum of quiry.

Midugang si Castillano nga aduna silay tulo ka quiry nga giduso sa Comelec En Banc, diin usa niini mao ang gipangayo nilang kasayoran bahin sa mga butang nga ilang andamon kay dili mahimo nga tanang mga election paraphernalia ilang dad-on sa panahon sa inihapay.

Ikaduha mao ang gasto sa pagdala sa mga election paraphernalia gikan sa Sugbo paingon sa kaulohan.

Samtang ang ikatulo mao usab ang pagduso ni manlalaban George Erwin Garcia og motion for clarification apan wala masayod si Castillano kun unsa ang unod sa maong mosyon. Midugang usab siya nga tungod sa pagduso og mosyon ni Garcia gimandoan sila nga ipasuspenso una ang canvassing hangtod nga adunay ruling nga mahimo.

Hinuon nagtuo si Castillano nga posibleng karong buwana masugdan na ang maong canvassing sa mga balota nga gikuwestiyon. (BANATNEWS)