'Bombing' sa Cebu City Jail naaktohan sa jailguard

CEBU, Philippines -  “Bombing! Bombing!” mao kini ang gibalik-balik og singgit sa usa ka tower guard nga si JO1 Leo Cesar Altamirano sa Cebu City Jail nga nakakita sa usa ka plastic pack nga gilabay sa luyong bahin sa maong bilanggoan niadtong Domingo sa alas-5 sa hapon diha sa barangay Kalunasan sa dakbayan sa Sugbu. 

Lima dayon ka jail guards ang nanggawas ug migukod sa mikaratel og dagan nga si Joelito Abasa, 28, nga taga sitio Aroma sa barangay Subangdako sa dakbayan sa Mandaue.

 Siya maoy responsable sa pagsuway og palusot sa 128 ka tin foils ug disposable lighters nga gisulod sa puting plastic nga gipatabanan og bato nga gilabay sulod sa male dormitory sa maong bilanggoan.

 Si SJO4 Noel Jaime, Chief Security and Control sa CCJ, mitug-an daghan ang mga tawong miduaw sa mga piniriso atol sa pagkahitabo dihang ilang nadunggan si Altamirano nga mitawag sa radio. “Mao ma’y paglingi ni Altamirano na’y nilupad nga plastic nga paingon sulod gi-alarma dayon namo ang guards,” sumala pa niya.

 Matud ni Jaime, nga si Abasa miangkon sa iyang gihimo ug mitug-an nga gisuholan ra siya og P2 mil sa usa ka ginganlan og Elvis Moniño, nga taga Sitio Sapa-Sapa, Barangay Subangdaku sa dakbayan sa Mandaue.

Gidugang ni Jaime nga si Moniño bag-ohay lang nakagawas sa CCJ niadtong Sabado tungod sa paghingos og rugby apan ang kaso gi-dismiss.

“Posible dunay contact sa sulod o ba kaha dunay cellphone ngadto,” matud ni Jaime.

Si Abasa kasamtangan karung gibalhog sulod sa detention cell sa Guadalupe Police Station ug gidala na kagahapon sa Provincial Prosecutor’s Office alang sa inquest proceedings gumikan sa kalapasan sa RA 9165 nga gipasaka batok kaniya. (BANATNEWS)