CEBU, Philippines - Usa ang patay ug pito ang nangalandig sa tambalanan niadtong Domingo atol sa Bag-ong Tuig human gipamusil ug gipangdunggab sa managlahing lugar dinhi sa dakbayan sa Sugbu. Si Kenneth Joseph Yburan, 19, taga sitio Magsaysay St., sa barangay Suba patay diha dayon human gipusil sa iyang dughan sa naila lang sa pangalan nga Brian uban sa laing usa ka wala mailhing lalaki.
Ang biktima mamuhatay og ‘puso’ diha sa sitio Lawis sa barangay Pasil kauban si Albert Obedas, pulos stay-in sa balay sa ilang agalon sa maong lugar dihang nahitabo ang pagpamusil.
Sumala pa sa imbestigasyon sa Homicide Section pinangulohan ni SPO4 Alex Dacua nga natulog ang biktima ug Obedas dihang misulod ang suspek ug kalit nga mipusil sa biktima makausa ka higayon.
Human niini miikyas ang suspek ug ang wala mailhing kauban niini ug padayon pang gitino sa kapolisan ang motibo sa krimen.
Samtang usa ka Niño Recesio,22, ug Jerwin Josol, 22, pulos residente sa sitio Callijon sa barangay Labangon ang gipamusil sa upat ka mga tawong nagsakay sa duha ka motorsiklo.Si Recesio naigo sa tuong paa samtang si Josol naigo sa ulo ug kritikal ang kahimtang niini sulod sa tambalanan.
Ang katapusang pagpamusil alas-4:15 sa kaadlawon sa Domingo diha sa Conception Gracefield sa barangay Subay diin usa ka Martin Ejares, 20, nagpuyo sa maong lugar ang gipusil sa ginganlan og Christian Diaz.
Ang biktima nakaangkon og samad pinusilan sa iyang tuong paa diha sa gawas sa diskohan diin giingong nag-atang ang suspek nga iyaha nang kontra kaniadto pa. Ang biktima nalandig sa Cebu City Medical Center (CCMC).
Sunod nga panghitabo nalambigit sa pagdunggab sa usa ka Dante Dublin,40, nga taga sitio Malinao sa barangay Carreta human dunggaba ni Sol Devino nga iyang silingan.
Pagka alas-6 sa buntag sa Domingo, usa ka Ronald Arellano, 39, nga taga Saint Jude St. , Hipodromo ang gidunggab sa dughan sa wala mailhing tawo dihang iyang gibisita ang higala diha sa barangay Carreta.Ang iyang asawa nay midala kaniya sa CCMC.
Samtang managbayaw usab ang gidunggab ug gisukmag diha sa sitio Lourdez sa barangay Cogon Pardo pasado alas-8 sa buntag sa Domingo nga giilang sila si Eduardo Enriquez, 35, ug Romer Sanjorjo, 32, sa ginganlan og ‘Sammy.’
Ang katapusang pagpanunggab nahitabo alas 9:50 sa buntag sa Domingo diha sa sitio Riverside barangay Duljo-Fatima diin usa ka Jigger Dela Torre,24, ang nakaangkon daghang samad dinunggaban sa nagkadaiyang bahin sa kalawasan human gidunggab sa iyang uyoan nga si Miguel Dela Torre. Ang mga biktima nadala sa CCMC samtang walay bisan usa ka suspek ang nadakpan sa maong mga krimen. (BANATNEWS)