CEBU, Philippines - Dul-an P20 mil ang nasakiyo sa usa ka wala hiilhing manglabnihay gikan sa usa ka negosyanteng nangompra didto sa barangay Tongo sa lungsod sa San Fernando sa miaging hapon.
Ang biktima mao si Magdalina Rubi Razo, 65, biyuda nga taga barangay Tabionan, sa maong lungsod ug may tindahan sa maong lugar.
P10 mil cash, bulawang kuwentas nga balor og P5 mil, ug mga groseriya nga kinompra sa biktima maoy nasakiyo sa nag-inusarang tulisan.
Si PO1 Cleofas Cabrera, desk officer sa San Fernando Police mibutyag sa Banat News nga ang biktima gikang nangompra sa iyang mga baligyaon sa usa ka mall sa siyudad sa Carcar.
Mitawag siya sa suki niyang drayber sa habal-habal nga si Jomar Intong, hingkod, ug nagpahatud siya sa ilang balay.
Apan pag-abot nila sa unahan mipara usab ang usa ka wala hiilhing pasahero, busa gipasakay kini sa drayber.
Apan sumala sa biktima nga samtang nagdagan na ang habal -habal ug misubay sa hilit nga lugar kalit nga gibunlot sa maong snatcher ang iyang shoulder bag nga gisudlan sa P10 mil nga kuwarta ug kuwentas bulawan nga ballot og P5 mil uban ang mga groseriya nga iyang kinompra.
Unya bisan nagdagan ang habal-habal nakahimo sa paglayat ang kawatan dala ang bag ug kinompra sa biktima ug mikaratil kini og dagan pahilayo sa maong dapit suot sa kalibonan.
Walay nahimo ang biktima gawas sa pagmando sa drayber sa motorsiklo nga iyang gisakyan sa paglahos ngadto sa buhatan sa kapolisan aron ipa- blotter ang maong hitabo.
Si PO1 Cabrera miingon nga may natumbok na sila karong suspetsado kansang ngalan ila pang gipugngan. (WC) (BANAT)