Namatay ang milayat sa lubi diha sa CCMC

CEBU, Philippines - Namatay gyud sulod sa Cebu City Medical Center ang lalaking milayat gikan sa punoan sa lubi diha sa barangay Apas ning dakbayan niadtong milabay’ng Huwebes sumala pa sa report sa TV Patrol Central Visayas kagahapon.

Apan daw gibasol sa igsuon sa namatay ang mga rescuers nga wala nila mapugngi ang iyang manghod ug nakaingon sa grabeng kadaot niining nahiaguman tungod sa pagkabunal sa bumper sa trak dayon ngadto sa sementadong dalan human molayat.

Ang namatay mao si Eric Morcado kinsa mikatkat sa lubi nga gibanabanang kapin sa 30 ka tiil sugod pa sa Huwebes sa kaadlawon hinungdan nga giadto kini sa mga bombero ug gisuwayan pagkombinsir sa pagpakanaog. Imbes nga mopatuo nangayo hinuon kini og armas kay buot kining maghikog nga gituman usab sa mga rescuers apan sa kalit lang milayat kini sa gitungtongang palwa .

 Sa report ang igsuon ni Eric nga si Melba nga taga Cahipa barangay Hipodromo miingon nga buotan ang iyang igsuon ug wa magumon sa ilegal nga drugas. Nasuta usab nga gibuwagan sa kanhi kapuyo si Eric.

Gimahay usab nila ang kakuwangon sa kahimanan sa resucers pagsalo sa iyang igsuon. (BANATNEWS)