4 mil MJ gilarot sa PNP ug Army

CEBU, Philippines - Kapin sa kwatro mil ka mga punoan sa marijuana ang nalarot sa hiniusang pagpangronda sa kapulisan ug militar dihang nadiskobrihan nila ang dakung plantasyon niini samtang paingon unta nga maghatud og warrant of arrest sa suspek sa kasong pagpatay diha sa bukirang bahin sa siyudad sa Danao niadtong Huwebes sa alas 5:00 sa hapon.

Matod ni PO1 Faron Avila, desk officer sa Danao City Police Station dihang nahinabi sa Banat News mibutyag nga sila si SPO1 Bryan Batiquin ug mga sakop sa 52nd Infantry Battalion pinangulohan ni Sgt. Ricardo Boada nag-uban aron unta ihatud ang mandato de aresto batok kang Ronald Batikan.

Ang warrant giisyu ni Danao City RTC Judge Edito Enemisio sa kasong murder.

Samtang naabot na sa maong lugar ang kapulisan ug militar nasigpatan nila ang dakung plantasyon sa marijuana hinungdan nga gitabangan nila kini pag-ibot uban sa 912 nga bag-ong tinanom.

Ang maong plantasyon sa marijuana nadiskobrihan duol sa pinuy-anan sa usa ka Tito Hernandez apan walay bisan usa ang miangkong sila maoy nananom niini.

Ang mga nalarot nga marijuana kasamtangang gikustodiya sa buhatan sa kapulisan sa Danao samtang nagpaabot sa kamanduan gikan sa Cebu Police Provincial Office (CPPO).

Hinuon pakyas pagsikop ang kapulisan ug militar sa target sa warrant arrest tungod kay wala na kini sa maong dapit. Nasayran nga halos matag semana adunay plantasyon sa marijuana nga madiskobrehan sa kapulisan sa bukirang bahin sa Danao apan way bisan usa nga nananom niini ang nadakpan. (BANATNEWS)