Miambak sa lubi

CEBU, Philippines -  Usa ka lalaking gituohang adunay problema ug nalisoan sa maayong pangisip ang suwerteng nasablay sa duha ka linya sa kuryente dihang kini milayat gikan sa punoan sa lubi kagahapon pasado alas-8 sa buntag diha sa Torralba St., sa barangay Apas siyudad sa Sugbu.

Wala mosaler ang gihimong negosasyon tali sa mga rescue teams sa Bureau of Fire Protection ngadto sa maong lalaki bisan paman nga gihatag na kaniya ang gipangayong armas nga .45 kalibre pistola.

Usa ka residente sa maong lugar nga si Edwin Yap nga nahinabi sa Banat News mitug-an nga alas-5 kagahapon sa buntag migawas siya sa ilang balay ug nilingkod sa kamalig atbang sa ilang balay nga ang luyo niini dunay duha ka punoan sa lubi sulod sa kural nga gipanag-iya sa ilang silingan.

Matud ni Yap nakadungog siya og yawyaw sa tawo apan wala niya kini tagda ug wala magdugay sa iyang paglingkod kalit lang natagak ang usa ka putot sa lubi duol sa iyang nahimutangan.

“Nihangad ko sa lubi ako na siyang nakit-an mao nga mitawag dayon ko sa barangay, akong nadunggan sa iyang yawyaw nga kun dunay pulis nga maagi magpapusil siya,” asoy pa ni Yap

Si Mary Joy Buffington residente sa maong lugar nga gikahinabi sa Banat News nagkanayon nga nianang gabii pa aduna nay nakakita sa maong lalaki ug kagahapon sa kaadlawon iya na kining nakit-an nga nagbatog na sa tumoy sa lubi apan wala lang niya kini panumbalinga. Alas-7 na sa buntag silang kapitan Ramil Ayuman uban sa iyang mga konsehal ug tanod misuway og hangyo kaniya sa pagkanaog.

Matud ni Ayuman nga mitawag siya sa buhatan sa Emergency Rescue Unit Foundation (Eruf) aron mo-request sa mga sakop niini apan giingnan lang sila nga ang unang gikinahanglan mao ang pulis o kaha mga sakop sa Bureau of Fire Protection (BFP).

Tungod niini gipadayon ni Ayuman ang paghangyo sa maong lalaki ug giagda og pagkaon ug tubig aron lang mokanaog apan armas ang gipangayo niini kay buot siyang maghikog.

Ang mga sakop sa rescue team sa BFP nga gipangulohan ni FO2 Romeo Birao nakig-negosasyon sa maong lalaki apan wala kini mopatuo hinungdan nga gihatagan kini sa gipangayong armas nga gisulod sa itom nga bag.

Adunay boom truck nga gibutang tungod sa lubi nga gisumpayan og kawayan nga hagdan diin gibutang ang bag nga gisudlan sa armas apan wala kini makaabot sa gikahimutangan sa maong lalaki.

Nianang pasado na alas-8 kalit lang miambak ang maong lalaki apan pag-abot sa tunga-tunga nasablay siya sa duha ka linya sa kuryente ug mibalitok ug unang mitugpa ang iyang agtang sa bumper sa boom truck hinungdan nga maayong pagkasamad niini.

Siya mitug-an sa iyang pangalan nga siya si Eric Norcardo nga taga Santiago Agusan Del Norte apan sa gihimong pakisusi sa mga opisyales sa barangay Apas nailhan ang tinuod niining apelyedo nga Pedrano.

Matud ni Pedrano wala na siya makamatngon unsay iyang gibuhat nganong misaka siya sa punoan sa lubi. Iyang gitug-an nga may igsuon siyang ginganlan og Vilma Sagang nga nagpuyo sa barangay Hipodromo.

Si Kapitan Ayuman sa dugang pakighinabi sa Banat News nagkanayon nga dili siya makaingon nga sakto o kuwang ang gihimo nilang negosasyon.

“Sa akong tan-aw dunay tendency nga maghikog gyud siya, kay nidiretso man og demanda armas, ang tawong maghikog, maghikog gyud,” asoy pa niya.

Ang maong hitabo napunitan og leksyon ni Ayuman kinsa mopatawag og tigom sa iyang mga konsehal aron hisgotan kun unsay ilang pamaliton nga kahimanan.

Daw nasagmuyo si Ayuman sa mga sakop sa ERUF nga wala mosanong sa iyang pagtawag aron makaresponde dayon human kini mobalibad ug milanat pa’g dul-an sa 30 minutos una pa sila naabot ug nadala sa Cebu City Medical Center (CCMC) si Pedrano.

Matud ni Birao dili unta mahulog sa lubi si Pedrano apan kalit lang natapigas ang pikas tiil niini sa palwa.(/EIM) (BANATNEWS)