Turista modagsang sa sugbo

CEBU, Philippines - Misaka og dul-an sa 20 porsiyento ang tourist arrivals dinhi sa Central Visayas ilabina dinhi sa Sugbo karung tuiga kun itandi sa milabay’ng tuig sa susamang kwarter sumala pa sa tourism officials.

Base sa talaan sa Department of Tourism (DOT)-7 nagpakita nga gikan niadtong Enero hangtud sa niaging buwan sa Septiyembre karung tuiga mitala og 626,731 ang tourist arrivals sa Sugbo nga dunay 17.96 porsiyento ang pagsaka itandi sa milabay’ng tuig.

Samtang sa domestic arrivals nirehistro usab kini og 827,346 nga misumada og 1,454,077 kon dunay pagsaka nga 4.75 porsyento.

Ang mga langyaw nga nag-una sa mobakasyon ug mibisita dinhi sa Sugbo mao ang Korean dayun gisundan sa mga Japanese, Hongkong, Taiwanese, Australian, German ug uban pa.

Matud ni Ofelia Rama Marquez ang senior tourism operations officer sa DOT-7 dihang nahinabi sa Banat News dunay yearly increase nga 12 percent ang tourist arrivals sa Sugbo ug Central Visayas kun pabiling normal ug way mga dagkung kakulian.

Nunot niini gituohan sa DOT-7 nga mas mosaka pa ang tourist arrivals apil na ang domestic arrivals karung mga buwana hangtud na sa Enero sunod tuig tungod usab sa nagsingabot nga Sinulog Mardi Gras karung petsa 15 sa Enero 2012.

Ang mga nindot nga talan-awon sama sa beach resort sa Sugbo ug mga iladong tourist attractions maoy gitumbok sa DOT-7 nga nakapadasig sa mga turista pagbakasyon dinhi sa Sugbo ug sa tibuok rehiyon. (BANATNEWS)