CEBU, Philippines - Gihatagan og hinabang sa kagamhanan sa lalawigan sa Sugbo ang mga molupyo sa barangay Cansaga ug barangay Pitogo sa lungsod sa Consolacion nga nakasinati og grabeng pagbaha niadtong miaging Martes sa kaadlawon.
Si Gobernador Gwendolyn Garcia ug Board Member Thadeo Ouano sa ikaunom nga distrito maoy nangunay sa pagtunol sa mga hinabang ngadto sa mga lumolupyo nga naigo sa nahitabo nga pagbaha dihang miawas ang tubig sa Cansaga River. Naglakip sa mga gihatag nga hinabang mao ang bugas, mga linata nga pagkaon, habol, banig ug uban pa nga gigahin gikan sa buhatan sa Provincial Social Welfare and Development Office (PSWvDO) nga gipangulohan ni Marivic Garces.
Si Ouano dihang nahinabi sa DyKC miingon nga daghan pa nga biktima sa pagbaha sa maong lugar ang wala pa makadawat sa maong hinabang gikan sa kagamhanan sa lalawigan tungod kay wala pa makompleto ang listahan sa naapektahan.
Matud pa ni Ouano nga gipaniguro hinuon sa municipal social welfare sa maong lungsod nga makadawat ang tanan nga mga biktima sa higayon nga makompleto ang listahan niini.
Kahinumdoman nga nakasinati og kusog nga pagbunok sa ulan niadtong Lunes sa hapon ug hangtod sa Martes sa kaadlawon nga maoy nakaingon sa pag-awas sa tubig sa Cansaga River sa nahisgotang lungsod.
Tungod sa kataas sa tubig baha gihiklin una ang mokabat 500 ka pamilya gikan sa ilang panimalay ngadto na sa mga barangay hall ug sports complexes sa nahisgotang mga dapit. Atol sa maong pagbunok sa ulan miawas usab ang tubig sa Butuanon River ug Mahiga Creek sa dakbayan sa Mandaue nga nakaingon usab sa pagbakwit sa mga molupyo sa mga dapit nga naapektohan.
Naglakip sa mga barangay nga naapektohan mao ang barangay Guizo, barangay Banilad, barangay Paknaan, Opao ug Alang-Alang sa maong dakbayan. (BANATNEWS)