CEBU, Philippines - Mitala og 1.5 milyones pesos ang danyos sa nasunog nga resthouse nga gipanag-iya og langyaw diha sa barangay Cabil-isan sa lungsod sa Alcantara niadtong Miyerkules sa alas 9:00 sa buntag.
Ang tag-iya sa nasunog nga resthouse mao si David Summer, nga Australian national ug naminyo sa Filipina nga si Veronica Salaysay Summer, nagpuyo sa maong lugar.
Matud ni SPO1 Ruben Lahiluden sa Alcantara Police Station dihang nahinabi sa Banat News ang caretaker nga si Antidio Tomaquin Salaysay, igsuon ni Veronica maoy nahabilin sa balay tungod kay atoa sa gawas sa nasud ang magtiayon.
Gikan pa sa umahan si Salaysay dihang sa iyang pag-uli nagkalayo na ang ikaduhang andana sa resthouse ug dali siyang mitawag sa kabomberohan ug kapulisan.
Pag-abot sa mirespondeng mga bombero naugdaw na ang tibuok resthouse ug naapil ang mga appliances niini. Atol sa pagsukitsukit sa mga sakop sa mga bombero nasuta nga mibuto nga circuit breaker ang hinungdan sa sunog nga daling mikaon sa mga light materials nga dapat sa maong resthouse sa ikaduhang andana.
Ang danyos gibanabanang niabot og 1.5 milyones apil na ang nangasunog nga appliances hinuon walay nakalas ingon man naangol sa hitabo. (BANATNEWS)