9 ka balay nasunog sa 2 ka brgy.

CEBU, Philippines - Duha sa siyam ka balay hingpit nga naugdaw   sa sunog nga nahitabo sa duha ka barangay ning dakbayan sa Sugbo kagahapon sa hapon.

Hinuon walay gikatahong nakalas ug naangol sa maong mga hitabo.

Ang unang alarma sa sunog nadawat sa kabomberohan sa dakbayan sa Sugbo sa alas 4:48 sa hapon sa sitio Silangan I, barangay Tinago.

Sa walo, unom niini ang igo lang nakan-an sa kayo ug ang duha   ka balay maoy hingpit nga naabo.

Si Cebu City Fire Marshal Aderson Comar mibutyag nga upat ka minuto nila nakontrolar ang maong sunog.

Matud ni Comar nga nagsugod ang kayo sa balay ni Roel Labores kinsa ila pang giimbistigar   karon.

Human mapawong ang sunog sa Tinago miulbo na usab ang laing sunog didto   sa F. Llamas, barangay Tisa ning dakbayan gihapon.

Ang balay nga nasunog gipanag-iya ni Marial Herlinda Daclan diin base sa imbestigasyon sa kabomberohan nagumikan sa di maayong paggamit sa kuryente ang hinungdan.

Hinuon igo lang nakan-an sa kayo ang tindahan ni Daclan nga giabangan ni Teresita Nabua kay nakontrolar dayon sa mga bombero sulod sa usa ka minuto. - Ryan Christopher J. Sorote sa The Freeman/WC (BANAT NEWS)