Naanod Sa Baha Namatay

CEBU, Philippines - Patay nang napalgan kagahapon sa buntag didto sa Pier 8 sa dakbayan sa Mandaue ang bata nga 6 anyos kinsa gianod sa baha sa Butuanon River   dapit sa sitio Salvacion barangay Maguikay niadtong Martes sa hapon.Ang biktima mao si John Lloyd Cañete, 6, nga taga Maguikay.

Si SPO1 Joselito Catabas sa buhatan sa Investigation Detection and Management Bureau (IDMB) sa Mandaue City Police Office (MCPO) nga nahinabi sa Banat News miingon nga ilang nadawat ang taho gikan sa mga tripolante sa barko nga nagpundo sa pantalan sa FF Cruz sa reclamation area sa Mandaue.

Matud pa ni SPO1 Catabas nga naglutaw ang maong patay’ng lawas sa bata nga ilang gituohan nga gianod sa maong dapit atol sa dakong baha sa Butuanon River niadtong Martes.

Ang patay’ng lawas sa biktima positibong giila ni Charis Cañete, 14, nga ig-agaw niini.

Ang kapolisan sa Mandaue mao nay nag-ugkat sa patay’ng lawas sa bata dayon ilang gipahiluna sa Rolling Hills sa barangay Banilad sa dakbayan sa Mandaue.

Sumala ni SPO1 Catabas nga ang biktima mikuyog sa mga silingan niini nga nangaligo sa sapa sa Butuanon sa ala 1:00 ang takna sa hapon niadtong Martes.

Apan matud pa nahiatol nga mibul-og ang dakong baha sa sapa ug naanod ang biktima.

Si Livy Cañete, ang apohan nga maoy nagsagop sa biktima human kini mailo sa amahan, miingon nga wala niini mabantayi ang paglakaw sa biktima hinungdan nga nasayran niyang naanod sa baha ang iyang apo dihang gisultihan siya sa mga gikaubang mga bata niini.

Sila si PO1 Earl Famador sa kapolisan sa Presinto 1 sa MCPO maoy unang gipahibawo ni Canete kalabot sa nahitabo sa iyang apo. 

Gumikan niini milusad dayon sila og search and rescue operation sa pagkaplag sa biktima apan mitikyop nalang ang kangitngit niadtong Martes wala gayud nila igkita ang biktima.

Matud pa ni PO1 Famador nga gisuhid nila ang katibuk-ang Butuanon river hangtod ngadto sa bukana niini sa reclamation area sa Mandaue apan napakyas gyud sila sa pagkaplag sa bata.

Kagahapon sa alas 6:00 sa buntag maoy ilang nasayran ang asoy sa mga taga barko nga nakit-an niini ang bata nga naglutawlutaw sa lapyahan sa Pier 8 hinungdan nga giugkat dayon kini sa mga otoridad. (WC)(BANAT NEWS)