CEBU, Philippines - Ang kagamhanan sa lalawigan sa Sugbo nagtinguha sa pag-kontrolar sa operasyon sa habal-habal sa mga dagkong kadalanan sa mga siyudad ug kalungsoran.
Atol sa tigom nga gipatawag ni Gobernador Gwendolyn Garcia kauban ni Cebu City Mayor Michael Rama, Lahug Barangay Captain Mary Ann delos Santos ug Balamban Mayor Ace Binghay ilang gituki ang mga posibleng lakang alang sa kalampusan ning nahisgutang katuyoan.
Gusto sa gobernador nga makakuha og rekord kalabot sa operasyon sa mga habal-habal ubos sa hurisdiksyon ni kapitan delos Santos ug mayor Binghay. Usa sa mga gitun-an mao ang pagtudlo ug pag-ila unya og mga lugar nga mahimong utlanan sa habal-habal nga mamasahero didto sa trans-central highway.
Kini tungod kay may mga habal-habal sa Balamban nga mohatod og pasahero paingon sa Lahug ug vice versa.
Ang ka-peligro sa maong karsada usa sa nakapabalaka sa gobernador hinungdan nga gitinguha niini nga makontrolar ang dagan sa mga habal-habal di lamang sa trans-central highway kundili sa tanang lungsod diin ang tag-duhay ligid nga pasaheroan mogabas-gabas sa mga dalan taliwala sa magbaguros nga mga dagkong sakyanan matag karon ug unya.(/WC)(BANAT NEWS)