Globe mitabang sa mga biktima sa Sendong

CEBU, Philippines - Agi og tabang sa mga nabiktima sa bagyong Sendong ang Globe Telecommunication mihatag og libreng tawag operations ngadto sa mga lugar sa Mindanao nga grabeng naapektohan sa kalamidad.

Gawas niini bukas usab ang ilang GCASH donate facility sa pagdawat og mga cash donation alang sa relief operation pinaagi sa text message.

Ang Globe mipahimutang og Libreng Tawag Centers sa nagkalain-laing lugar sa Cagayan de Oro City, Iligan City ug Dumaguete City diin ang mga mibakwit makapahimus sa libreng tawag sulod sa lima ka minutos ngadto sa tanang mga local network ug duha ka minuto sa international call.

Ang Globe miinstalar usab og libreng internet nga magamit sa mga bakwit aron duna silay komunikasyon ngadto sa ilang mga minahal sa kinabuhi nga atoa sa abroad o aron masusi nila ang kahimtang sa mga nawagtang ug nakaplagan nga mga biktima.

Ang mga computer sa Libreng Tawag Centers magamit usab sa mga volunteer sa DSWD   sa paglista sa mga bakwit.

Ang mga Libreng Tawag Station gibuksan sukad niadtong Domingo Disyembre 18, 2011 sa covered court sa barangay Macasandig, City Central School, West City Central School Cagayan de Oro City ug Mindanao State University-Iligan Institute of Technology, Iligan City National High School ug Obaldo Laya Elementary School sa Iligan City, Batinguil Elementary School, Canduay Elementary School, Dumaguete, Sibulan Municipal Market sa Dumaguete City.

Ang Globe mibukas usab sa ilang GCASH donate facility diin ang mga Globe subscriber pweding maka-donate pinaagi sa pag-text DONATE (space) AMOUNT (space) MPIN (space) SLB ug send sa 2882 nga libre.

Ang Simbahan Lingkod ng Bayan (SLB) usa sa mga partner sa Globe sa ilang relief operations.

Sukad niadtong Miyerkules ang Globe aduna nay nadawat nga P320,000 nga cash donation pinaagi sa GCASH-SLB donation channel.

Ang Globe nakapanghatag na og relief goods ngadto sa barangay Balulang, Bulao ug Consolacion sa Cagayan de Oro City, Junob Tabuctubig sa Dumaguete City, Magatas sa Sibulan ug Mindanao State University-Iligan Institute of Technology sa Iligan City diin mikabat ngadto sa 2,600 ka mga pamilya ang nakabenepisyo niini. (BANAT NEWS)