CEBU, Philippines - Gipanghimakak ni 6th District Congressman Gabriel Luis Quisumbing sa sixto distrito sa lalawigan sa Sugbo ang alegasyon ni ANAD Partylist Representative Jun Alcover nga may P1 milyon nga suborno ang gihatag ngadto sa mga kongresista nga mipirma sa impeachment complaint batok ni Chief Justice Renato Corona.
Matud pa ni Quisumbing nga walay kamatuoran ang gipasangil ni Alcover ngadto sa mga kongresista kansang tuyo mao nga maimbistigahan si Corona sa mga kadudahan niyang pangatungdanan sa labing taas nga hukmanan sa nasud.
"Unfortunately the statement of Representative Jun Alcover is absolutely untrue", matud pa ni Quisumbing kinsa miawhag kang Alcover nga mas labing maayo nga hinganlan niini kun ugaling may matumbok man siyang magbabalaod nga nakadawat sa giingon niyang suborno.
Si Quisumbing nagtuo nga ang House of Representative karon nga gipangulohan ni House Speaker Sony Belmonte dili sayon nga impluwensiyahan tungod kay kusganon kining misuporta sa panglantaw ug baruganan ni Presidente Benigno Aquino III nga maluwas gikan sa korapsyon ang nasud sa Pilipinas.
"The institution (House of Representative) is not susceptible to that kind of influence. We strongly support the vision of the president that a reform country is free of corruption," sigun pa ni Quisumbing atol sa interview nga gihimo sa tigbalita kaniya dihang nagpasiugda siya og mass wedding sa 86 ka mga parisang magtiayon didto sa Gethsemane Parish sa siyudad sa Mandaue sa miaging Martes.
Gipasabot ni Quisumbing nga ang pagpirma sa kapin 90 ka mga kongresista sa giindorsar nga articles of impeachment ngadto sa senado batok kang Chief Justice Corona usa ka maayong timaan sa pagsumpo sa korupsyon sa nasud.
"Our endorsement of (Corona's) impeachment is very good step in making sure that the president's agenda will be advanced," dason pa ni Quisumbing.
Si Quisumbing mitumbok nga wala gyuy gipanghatag nga "reward" o ganti kanila sa ilang pagpirma sa impeachment complaint batok kang Corona ug labaw sa tanan walay si bisan kinsa usab ang nangayo niini. Dugang pa sa kongresista sa sixto distrito nga ang ilang gihimo sa pagpa-impeach kang Corona usa ka lakang aron pagpalambo pa sa maayong kalidad sa panggobiyerno dinhi sa Pilipinas.(/WC)(BANAT NEWS)