Lolo milugos sa 13 anyos gikiha

CEBU, Philippines - Gipasakaan na og kaso ang usa ka 70-anyos nga lolo kinsa gidakop human pasanginling milugos sa 13-anyos nga batang babaye niadtong Sabado sa buntag sulod sa iyang awto diha sa usa sa mga barangay sa dakbayan sa Talisay.

Kasong pagpanglugos may kalambigitan sa kalapasan sa Akta Republika 7610 kon “Anti-Child Abuse Law” batok sa tiguwang nga suki sa puto sa biktima matud pang PO2 Violeta Godines sa Women and Children Protection Desk (WCPD).

Matud sa bata nga naagian siya sa suspetsado (pangalan gipugngan aron di mailhan ang biktima) kinsa nagsakay og kotse diha sa daplin sa karsada ug mihagad kini sa bata nga pasakyon tungod kay iyang kuyogon ug hatagan og pinaskuhan.

Samtang diha sila sa sulod giingong giingnan siya sa suspek nga manuroy sila sa mall sa Tabunok apan nahibulong ang bata tungod kay diha man kini mihunong sa lugar nga nahitaboan.

Ang suspetsado nanaog sa sakyanan ug nangihi ug mibalik kini og sakay diha sa likod nga bahin ug mitapad sa biktima dayon diretso og hubo sa sapot ug mimando sa biktima nga pahubuon sad.

Matud sa biktima nga nagdumili siya sa mando sa suspetsado ug mipasangil nga mangihi apan wala siya makaabli sa pultahan ug tungod sa kahadlok wala na siya mosukol pa sa gibuhat sa suspek kaniya.  

Usa ka gwardiya ang nagsusi sa sakyanan tungod kay nag-uyog-uyog kini hinungdan nga ang suspetsado daling mibalhin sa atubangang bahin sa kotse niini.

Gikataho nga nakita sa gwardiya nga walay sapot ang ubos nga bahin sa lawas sa suspetsado. Ang bata uban sa iyang inahan nga misumbong sa kapolisan sa maong hitabo. (BANAT NEWS)