CEBU, Philippines - Mikabat sa 2,500 ka mga kabus nga molupyo sa barangay Duljo -Fatima ning dakbayan sa Sugbo ang nakapahimus sa bundle of joy nga gi-apod apod sa usa ka pribadong indibidwal niadtong adlaw sa kasaulogan sa Pasko.
Ang konseho sa maong barangay nga gipangulohan ni kagawad Joel Ycong maoy nanguna sa pag-apod apod sa nagkalainlaing butang nga pagkaon isip pinaskohan sa mga hingtungdang molupyo nga gilangkoban sa tagsa ka sako nga gisudlan og lima ka kilong bugas nga Ganador uban sa nagkadaiyang mga delata sama sa karne norte, beef loaf ug uban pa ingon man slice bread.
Gibahin og duha ka hugna ang pagpang-apod apod sa maong mga pinaskohan diin ang mga taga Fatima didto makadawat niini sa ilang barangay hall, samtang sa taga Duljo, didto usab modawat niini sa Sitio San Pedro Chapel sa maong barangay.
Kini gihimo sa paglikay nga maghuot ang bagang duot sa mga molupyo nga nakadawat sa maong mga gasa sa Pasko.
Si konsehal Ycong mitataw nga matag tuig na kining gihimo sa JJ Paz Lending kansang malumo nga kasingkasing sa tag-iya niini di makalimot sa mga kabus sa panahon sa Pasko.
Gipasabot sa konsehal nga sa wala pa ipanghatag ang mga pinutos nga pinaskohan gipanghatagan una ang mga molupyo sa 36 ka mga sitio sa maong barangay og mga tiket.
Ang kapin sa 2000 ka pamilya nga nakadawat sa maong pinaskohan nagbaguod og pas-an sa ilang mga gasa ug mapasalamaton kaayo sila ngadto sa malumo og kasingkasing nga naghatag niini. (BANAT NEWS)