2 ka operator gipangluba

CEBU, Philippines - Naangol ang duha ka operator sa sound system sa diskohan human kini panunggaba sa duha ka maniskohay didto sa barangay Bangbang sa lungsod sa Cordova sa miaging kaadlawon.

Ang mga biktima mao sila si Rodel Tura, hingkod, ug Jovanni Sandoval, 27, nga pulos taga sitio Matab-ang sa nahisgotan gihapong barangay sa maong lungsod .

Samtang ang mga suspetsado mao sila si Roland Sumagang ug Benzon Minguito nga pulos silingan ra usab sa mga biktima.

Si PO3 Rolando Tagsip sa kapolisan sa maong lungsod miingon nga gipahigayon ang disco sa maong dapit isip kabahin sa ilang pagsugat sa tungang gabii sa adlaw sa Pasko.

Nalingaw kaayo ang mga batan-on sa sinayaway sa disco sa maong dapit nga gisugdan sayo sa gabii niadtong Disyembre 24 hangtod sa alas 3:00 sa kaadlawon sa Disyembre 25.

Tungod kay wala matagbaw, misuway og duol ang suspetsado nga si Sumagang ngadto kang Sandoval kay nangayo og dugang pang tukar nga disco kay giganahan pa siyang mosayaw.

Apan matud pa ni PO3 Tagsip nga gibalibaran sa biktima ang maong suspetsado hinungan nga puwerting sukoa niini.

Si Tura miduol sa duha kay buot niining badlungon ang panag-away niini dihang gisugat kini ug gidunggab ang kilid .

Busa milihok usab dayon si Sandoval aron tabangon si Tura apan gibunalan og puthaw ang iyang ulo hinungdan nga nalipong usab ang nahauna.

Samtang gidali paghatod ngadto sa duol nga tambalanan ang mga biktima, dali usab kaayong nakasibat ang mga suspetsado ug padayon pang gipangita sa kapolisan.( /WC)(BANAT NEWS)