Gamay ra ang nabuthan - DOH

CEBU, Philippines - Mas minus ang mga nabiktima sa pabuto atol sa pagsugat sa Pasko niadtong Sabado sa gabii kun itandi sa miaging Pasko sa nakalabay’ng tuig sumala pa sa Department of Health (DOH)-7. Ang DOH-7 milusad sa “Iwas Paputok Program” maoy nag-monitor sa mga tambalanan sa lalawigan ug migawas nga hangtud kagahapon sa buntag duna palang siyam ka mga nabiktima sa pabuto atol sa pagsugat sa Pasko dinhi sa Sugbo.

Moabot ngadto sa 57 ang nangaangol sa pabuto sa miaging tuig gikan sa Pasko ngadto sa Bag-ong Tuig ug ang 46 niini nagikan sa Cebu .

Samtang duha ka mga biktima ang nasamdan sa stray bullets niadtong Pasko nga gikan sa barangay Bulacao ug Labangon.

Matud ni DOH-7 director Susana Madarieta dihang na-interbyu sa DyDD nga walay namatay tungod sa pabuto ug minor injuries lang ang sagad nga naangkon ug kasagaran nila nakagawas lang sab dayon human madapati og tambal ang mga biktima.

Nunot niini miapelar si Madarieta sa publiko nga likayan ang paggamit sa mga pabuto atol unya sa pagsugat sa Bag-ong Tuig, ang maong selebrasyon maoy sagad adunay daghang disgrasya sa pabuto.  (BANATNEWS)