Patay'ng babaye naglutaw sa sapa

CEBU, Philippines - Usa ka patay’ng lawas sa wala pa hiilhing babaye napalgan nga naglutaw sa sapa nga nahimutang sa kilid nga bahin sa bag-ong merkado publiko sa sitio Tribunal sa barangay Centro sa dakbayan sa Mandaue sa miaging Pasko.

Si SPO2 Marcos Noval sa homicide section sa Mandaue City Police Office (MCPO) miingon nga ang unang nakakita sa maong lawas patay mao si Roger Armenton ang maintainance worker sa bag-ong merkado.

Matud pa ni SPO2 Noval nga ang maong babaye ilang gibanabana nga anaa sa 50 kapin ang panuigon, kasarangan ang gidak-on ug nagsul-ob og puti nga t-shirt ug pink ang kolor sa iyang mini-skirt. Dugang pa niya nga dili pa nila matataw kun may foul play ba ang kamatayon sa maong babaye.

Si SPO2 Marcos miingon nga natahap usab sila nga ang maong patay’ng lawas naanod sa kadagatan sa Mactan Channel ug sa pagtaob sa dagat gidagsa kini didto sa sapa sa barangay Centro ug nasangit sa maong lugar dihang mihunas na ang dagat.

Gipaabot nila karon ang mga kabanay nga moila sa maong patay’ng lawas nga kasamtangang ginganlan nila og Miss X sulod sa Cosmopolitan Funeral Parlor sa barangay Ibabao, sa maong dakbayan.   - (BANAT NEWS)