CEBU, Philippines - Gipusil patay sa wala hiilhing mamumuno ang usa ka gidudahang gun for hire samtang nagduwa kini og billiard didto sa Sityo Tal-ot barangay Valencia siyudad sa Carcar niadtong Domingo sa alas 7:30 sa gabii atol sa Pasko.
Ang biktima mao si Edward Satomtakal, 29, ulitawo, nga taga sitio Bas, barangay Perrelos, nabaniog nga usa ka gun for hire.
Si PO1 Alvin Torres, desk officer sa Carcar City Police mibutyag sa Banat News nga wala makabantay ang biktima dihang miabot ang kriminal samtang nagduwa kini og billiard
Human pauwani og daghang bala gikan sa ulo hangtod sa nagkadaiyang parti sa lawas nahagba kini sa yuta ug diha-diha nabugtoan sa kinabuhi ug misibat usab dayon ang kriminal.
Pag-abot sa mga polis nga gipangulohan ni PO3 Vicente Garces nagbuy-od na ang biktima sa yuta nga naglunang sa kaugalingong dugo hinungdan nga gihatud dayun nila ngadto sa Carcar City District Hospital diin ideklarar sa mga doctor nga dead on arrival.
Ang kapolisan nakapunit og usa ka lumping na nga tingga sa bala sa wala pa matinong kalibre sa armas nga gituohang iya sa mamumuno.
Ang kapolisan nagpahigayon pa og dugang pakisusi sa background sa biktima aron matumbok ang motibo sa maong pagpusil kaniya ug ang pagka-hired killer niini. (/WC) - (BANAT NEWS)