Department store sa Colon nasunog

CEBU, Philippines - Hangtud ning pagsuwat ning balita wala pa gihapon maundang ang baga nga aso ug padayon pang nakigbisog ang mga bombero sa kalayo nga mitumaw sa Gaisano Capital sa Colon Street sa eskina Leon Kilat.

Ang maong sunog giisa na ngadto sa general alarm task force bravo diin ang tanang kabomberohan sa Sugbo mitabang na sa pagpalong sa baga nga aso ug kalayo.

Nasayran nga ang maong sunog nagsugod pasado alas-12 sa tungang gabii niadtong Huwebes dihang nabantayan ang baga nga aso gikan sa sulod ug gisundan og buto sa sulod sa maong establisamento.

Tungod sa ka init sa aso ug sa kalayo ang atbang niini nga establisamento nga usa ka fast food chain nasunog ang generator apan dali ra usab kini nga napalong.

Ang head guard sa maong establisamento nga si Junrell Villamor misaysay nga sa wala pa mahitabo ang maong insidente, upat ka gwardiya ang nag-roving ug usa kanila ang nakabantay nga dunay aso sa may receiving area.

Hinungdan nga dali silang mitawag sa Cebu City fire department diin dali usab kini nga nagpadala og kabomberohan.

Apan si Fire Marshall Aderson Comar misaysay sa The Freeman ang igsuong pamantalaan sa Banat News nga nadismaya siya sa ilang pag-abot tungod kay usa sa mga representante sa maong establisamento nagdumili kanila sa pagpasulod.

Hinungdan nga napugos sila og pangita og laing agianan aron lang makapasirit og tubig. Diha palang sila gipasulod pagkaalas 4 na sa buntag.

“We entered the burning building roughly four hours after we responded. The fire is already worse,” pasabot pa ni Comar.

Tungod sa kabaga na sa aso sa maong establisamento gikinahanglan nga buk-on ang mga bildo niini ug ubang mga bungbong aron lang makagawas ang aso.

 “Because of the thick black smoke, we need to ventilate the entire building,” matud pa ni Comar.

Dismayado usab sila tungod kay gikinahanglan nila ug daghang breathing apparatus (BA) aron maka-agwanta sa baga kaayong aso sa sulod apan aduna lay 15 ka BA, hinuon gipahuwam sila sa Lapu-lapu City Fire Department.

Si Mayor Michael Rama nga diha usab sa lugar mipakanselar sa night market diha sa Colon tungod sa kabaga sa trapiko.

Ang Banat News misuway unta og tawag sa telepono sa giingong press relations officer sa maong establisamento apan dili makontak ang cellphone niini.

Tungod niini, si Jack Jakosalem sa City Traffic Office Management (CITOM) mibutyag atol sa interbyu sa TV Partol Central Visayas nga hilabihan nga problema sa trapiko tungod sa maong sunog.

Hangtud ning pagsulat sa balita sa alas-7 sa gabii padayon pa ang kombate sa mga bombero pagpalong sa sunog samtang baga kaayo ug itom nga aso ang padayong nanggawas sa maong edipisyo. (BANATNEWS)