CEBU, Philippines - Malampusong gisaulog kagahapon ang ika-4th Festival of Lights o “Dagitab” sa dakbayan sa Naga nga gisalmutan sa mga tinun-an sa nagkalain-laing tunghaan sa siyudad.
Ang maong kasaulogan nga molungtad og usa ka semana gilangkuban kini og dance showdown, live band concert, daygon ug choral competition.
Kagahapon sa alas 4:00 sa hapon gipahigayon ang street dancing sa walo ka mga Dagitab contingents.
Ang maong dancing contingents naggikan sa unom ka mga pampubliko ug pribadong tunghaan sa siyudad nga mao ang Naga, Balerong National High School, Don Emilio Canonigo Memorial, Tuyan ug Uling national high schools, Siena School of Naga ug Profesional Academy of the Philippines.
Ang ritual showdown sa mga contingent gipahigayon human sa panihapon diha sa Saint Francis of Assisi Park mga alas 6:00 sa gabii diin usab sa maong lugar gipahiluna ang kahoy nga entablado alang sa mga dancers.
Ang tulo ka mga local government units (LGU) sa lungsod sa Minglanilla, Sibonga ug dakbayan sa Carcar nga parehong ubos sa unang distrito ang nagpadala og festival dance group isip mga guest performers.
Ang grand champion sa ritual showdown makadawat og P25 mil nga premyo samtang P20 mil ug P15 mil ang second ug third prize ug gawas sa kwarta makadawat usab sila og tropeyo.
Ang makadaog sa street dancing makadawat kini og P12 mil nga premyo, P8 mil ug P5 mil sa second ug third prize ug usab tropeyo. Si Kongresista Eduardo Gullas sa unang distrito sa lalawigan sa Sugbo ug Gobernador Gwendolyn Garcia maoy mga pinasidunggan dinapit sa maong kalihukan.
Kagahapon 100 ka mga sky lanterns ang gipalupad sa siyudad ug dunay fireworks display usab nga lakip sa kasaulogan. (BANATNEWS)