CEBU, Philippines - Misangko sa tambalanan ang gipahigayong Christmas party sa bag-o lang mga nakapasar sa nursing examination dihang sa ilang pagpauli nalimbuwad ang multicab nga ilang gisakyan diha sa dalan A.S. Fortuna sa barangay Banilad, dakbayan sa Mandaue.
Si PO1 Roland Geledo sa traffic division sa Mandaue City Police Office (MCPO) miingon nga gimaneho ni Christopher Bernie Paculaba, 22, taga Corazon Village sa barangay San Isidro, dakbayan sa Talisay ang open-type multicab.
Dugang pa niya nga gikan sa usa ka kan-anan sa nahisgutang lugar diin gipahigayon ang ilang Christmas party ang mga biktima agi’g pagselebrar sa pagkapasar nila sa pasulit sa nursing sa miaging bulan.
Matud pa ni Geledo nga padulong na untang mamauli ang mga biktima diha agi sa A.S. Fortuna sa barangay Bakilid nawad-an og kontrol sa manobela si Paculaba dihang milikay unta sa manhole nga walay takob nga gibutangan lang og warning device.
Ang mga biktima mao sila ni Rachel Mortalla, 21, Edwin John Liceo, 20, Clifford Bayson 22, Laarni Antor, 20, Marilyn Gadiane, 22, Dolly Love Adolfo, 21, Kineth Grado, 21.
Lakip sa naangol mao si Adrien Sabliga, 22, Nelson Mabanto, 25, Cristopher James Tabon, 21, Philip Cheng, 23 , John Michael Gallos, Argie Roble, ug ang driver nga si Paculaba, 31. Matud pa ni Paculaba nakainom na ang tinud-anay nga driver sa multicab hinungdan nga siya ang nagmaneho niini.
Tungod kay kusog ang dagan ug sa kakalit sa pagliko nalimbuwad ang multicab nga niadtong tungora adunay sakay nga 14 ka tawo hinungdan sa ilang pagkaangol.
Dali nga gidala sa Mandaue City Hospital ang mga biktima ug ang pipila kanila didto gidala sa pribadong tambalanan sa dakbayan sa Sugbo (EIM) (BANATNEWS)