Ang Pasko sa mga Senior Citizens

CEBU, Philippines - Of course, usa ra ka matang sa Pasko ang atong saulogon, regardless sa edad. Apan, managlahi ang matang sa atong pagsaulog. In fact, itandi sa atong mga panahon kanhi, sa mga batan-on pa kita, lahi na kaayo ang pagsaulog sa ato karong mga batan-on.

Alang kanato, ambut pila na ka Pasko ang milabay sa atong kinabuhi. Of course, di ta ganahang moihap kay motukma man kini kun pilay atong edad. Nia ra bay uban nato, sama nako, dili gustong masayran ang edad gipabiling secret.

Samtang usa ra ang atong pahinungdan pagsaulog sa Pasko, lainlain ang atong panglantaw niini. After Christmas, unsa man? Aduna ba kini epekto sa atong kinabuhi? Usahay god, gumikan sa pagka-materialistic na kaayo karon sa kalibutan, mora man og wala na mahitukma ang atong pagsaulog sa Manunubos. 

Gihimo na kining negosyo sa uban. Gihimo nang higayon pagpasuwabi ug pagpatuyang sa mga lawasnong kahinam. Inom dinhi, inom didto; sugal dinhi, sugal didto; kaon dinhi, kaon didto; lingawlingaw dinhi, lingawlingaw didto; ug unsa pa nang ubang kahilayan. Dili man ni dautan per se. Apan, usahay god, mo-detour man ang pagsaulog, mopaingon sa lavish celebration nga masukwahi na sa tukmang hinungdan ngano nga adunay Pasko.  

Hinoon, nalipay kita nga puno gihapon ang mga Simbahan sa Misa de Gallo. Sa ato pa, daghan pa kanato ang naghatag og kabalaan ug tukmang kahulogan sa Pasko. Nga kun wala pay Pasko, kun wala pay birthday sa Batang Hesus … wala say Salvation. Imagine kono kun walay Salvation. Nag-unsa na kaha kita karon?

Ingon niini ang kahulogan ug kamahinungdanon sa Pasko, alang kanatong mga Senior Citizens, nga usahay i-take for granted lang sa ato karong mga batan-on, ug giisip nga usa lang ka yanong celebration, sama sa atong pagsaulog sa Labor Day o sa Rizal Day, nga wa gyuy mahitabo after the celebration 

Apan, una sa tanan, kun sa kalibog sa Mahal nga Birhen, wala siya mosugot nga mahimong Inahan sa Manunubos, wala untay Child Jesus, ug sa ato nang giingon, wala sad untay Salvation.

Busa, maoy atong panghinaut nga taliwa sa atong paglipay kaylagi Pasko, dili nato i-detour ang pagsaulog ngadto sa pagpakasala ug pagpahilayo na hinoon sa hinungdan ngano nga dunay Pasko.

Himoon natong balaan ang Pasko ug atong hatagan sa tukmang kahulogan, aron makasulod usab ang Batang Hesus sa atong kasingkasing, ug dili sa pasungan sa baka.

Merry Christmas kanatong tanan! In the meantime, paminaw ug interact sa Senior Citizens sa Senior Citizens Hour, DyRC, 648 kHz, 4:00-6:00 pm matag Sabado, tels. 4125249, 2388173. (BANATNEWS)