P60 mil nadala sa kawatan

CEBU, Philippines - Moabot P60 mil nga koleksyon sa usa ka salesman ang nasakiyo sa wala pa mailhing kawatan human lungkaba ang trak de karga niini nga gi-parking sa barangay Poblacion lungsod sa Badian niadtong Huwebes sa alas 6:30 sa gabii.

Igo nalang nagpa-blotter sa kapolisan ang biktima nga si Michael Millan,31, taga lungsod sa Dalaguete ug salesman sa Dranix Distributor Philippines nga nagbase sa Labangon ning dakbayan sa Sugbo.

Matud ni PO1 Mauro Gramatica sa Badian Police Station dihang nahinabi sa Banat News mibutyag nga gi-park ni Millan sa atubangan sa ilang balay ang trak.

Apan sa iyang pagbalik guba na ang lock sa tuong pultahan sa trak maong gisusi niya og dali ang sulod apan wala na diha ang bag nga gisudlan sa iyang koleksyon.

Ang kapulisan padayon pa sa imbestigasyon sa maong kaso. (BANATNEWS)