Nasagmuyo sa asawa naghikog

CEBU, Philippines - Patay nang napalgan ang usa ka lalaki nga gidudahang naghikog gumikan sa kasagmuyo niini ngadto sa asawa diha sa punoan sa kahoy sa sitio Puso, barangay Poblacion lungsod sa Cordova sa milabay’ng buntag.

Ang nagpakamatay mao si Deogenis Valdez, 49, residente sa maong dapit.

Alas 5:30 sa milabay’ng buntag gikatahong napalgan ang patay’ng lawas ni Valdez sa likod nga bahin sa panimalay niini nga dunay pisi sa liog.

Gidudahan sa kapolisan nga naputol ang maong pisi nga gihikot ngadto sa punoan sa Gemilina apan paigo na kini aron kini makapatay kaniya.

Nasuta usab sa kapolisan nga adunay suicide note si Valdez ug ang anak pa niini maoy gipasuwat. Giingong walay kalibutan ang anak nga suwat pagpakamatay ang iyang gihimo para sa amahan.

Matud pa nga diha sa suwat nasutang adunay problema ang relasyon sa magtiayon apan sa iyang mga anak hapsay ang ilang relasyon.

Pipila ka residente sa maong dapit mibutyag sa Banat News nga nasagmuyo usab si Valdez sa iyang asawa human kini gipabilanggo sa naulahi pipila ka adlaw na ang nakalabay.

Sa imbestigasyon sa kapolisan nasuta nga sa wala pa mahitabo ang pagpakamatay ni Valdez nagkalalis pa kini sa iyang asawa.(/EIM) (BANATNEWS)