Gitun-an kun makasohan ang inahan

CEBU, Philippines - Ang kapolisan sa dakbayan sa Talisay wala pa mobutyag kung pasakaan ba og kaso ang inahan sa 10-adlaw nga batang lalaki kinsa namatay niadtong Lunes diha sa barangay Tanke.

Si Superintendent Eddie Recamara, hepe sa Talisay City Police Station sa pakighinabi niini sa Banat News kagahapon nagkanayon nga kagahapon pa sila sa buntag nakahibalo human sila manawag nga duna nay resulta sa autopsy sa puya.

Matud niya nga ipakuha pa niya ang resulta sa autopsy ug kung makuha na nila kini mopahigayon pa sila og dugang imbestigasyon kung mapasakaan ba og kaso ang inahan sa nahisgutang puya.

Kahinumduman nga ang maong puya namat-an na lang kini sa iyang inahan nga nag-agas na ang dugo sa ilong ug baba lakip na sa pusod niini.

Ang mga silingan sa pamilyang Malakay nagtuo nga ang bata gibalbal kini apan base sa report ang bata namatay kini tungod kay wala makadug-ab.

Sa resulta sa autopsy ni Dr. Joe Martin Fuentes sa PNP Crime Laboratory nasuta nga ang tuong bahin sa baga sa bata dunay fluids nga gituohang gatas nga gipainom niini niadtong Domingo sa gabii.

Ang bata dunay aspiration pneumonia nga gipasabot ni Fuentes nga mahitabo kini ngadto sa bata kung kini pakatulgon dayon dili padug-abon inig human og suso.

Ang gatas nga nainom sa bata nga magpundo diha sa tiyan kung dili kini makadug-ab mosaka sa pagbalik ug adto kini mosulod sa baga ug kung mahitabo kini dunay higayon nga magsuka-suka ang bata.

Matud usab ni Fuentes nga ang giingong dugo nga nakita diha sa lawas sa bata dili kadto dugo apan usa ka fluid human nga naputol ang pusod niini. (Brenda D. Batuto/EIM) (BANAT)