Aussie nabulasot sa carbon mireklamo

CEBU, Philippines - Usa ka Australian national ang mipadangat sa iyang reklamo ngadto sa buhatan ni Mayor Michael Rama kagahapon human siya nabulasot sa kanal sa may Carbon area habig sa dalan V.Gullas.

Ang Australian national nga si George Sydney Carlsen, 69, niadto sa Carbon kagahapon sa buntag uban sa iyang uyab nga Filipina nga si Marie Jell Fernandez, 45, aron mamalit og water pump alang sa ilang basakan didto sa Dumaguete City.

Apan samtang siya naglakaw kalit kini nabulasot sa baho kaayong kanal nga lapas sa iyang hawak ug nakabaton og mga pangos ug bun-og sa pipila ka bahin sa iyang lawas.

Ang maong langyaw wala makapugong sa iyang kaugalingon nga nakasaway sa drainage system sa dakbayan sa Sugbu ug mikomparar dayon niini sa mga nindot nga mga lugar nga iyang nabisita sa ubang mga nasud.

Ang langyaw ug uyab niini human makapatambal ug nakaligo miadto dayon sa City Hall aron hangyuon si Rama nga kinahanglan nga patabunan na ang maong kanal aron wala na’y laing mabiktima niini.

“Nianhi lang mi dinhi (City Hall) kay dili mi gusto nga duna pa’y ubang tawo nga mahulog sa kanal, kay luoy intawon kaayo kung sila na pud ang mabiktima,” sumala pa ni Fernandez.

Wala nila maabti ang mayor kagahapon gumikan kay duna kini importanteng gilakaw apan gidala siya sa mga tawo sa mayor sa Cebu City Medical Center.

Gikatakdang i-forward na sa mga staff sa mayor ang maong problema ngadto sa Department of Engineering and Public Works (DEPW) nga mao man untay gitahasang masigurong luwas, limpyo ug sirado ang mga kanal sa dakbayan. (/EIM) (BANAT)