Kapin 10mil naapektahan ni Sendong sa Negros

DUMAGUETE CITY, Philippines  – Miabot ngadto sa 10,420 ang apektadong pamilya sa bagyong Sendong sa Central Visayas partikular na sa Negros Oriental sumala pa sa gipagawas nga report sa Provincial Disaster Risk Reduction Management Council (PDRRMC) ug Office of Civil Defense (OCD-7) sa Central Visayas.

Hinuon kini mas ubos kumparar sa nahaunang gipagawas nga report sa OCD atol sa PDRRMC meeting niadtong Disyembre 19 diha sa buhatan sa gobernador sa Dumaguete City kini human maberipika sa OCD ang kompletong report sa mga apektadong lugar.

Matud pa sa PDRRMC 37 ka tawo ang nakalas samtang 247 ka tawo ang nangaangol ug tulo ang padayong missing. Gibanabanang moabot sa P37 milyones sa mga hayopan, humayan, kamaisan ug uban pang tanom ang danyos.

Niadtong Sabado sa kaadlawon gikusokuso og kusog nga uwan nga susama sa usa ka bulang pag-uwan ang maong lalawigan. Susamang hitabo usab ang natagamtaman sa Northern Mindanao diin gihimong kalapokan ug nagpasad ang mga patay’ng tawo, hayopan, ug kabalayan ang siyudad sa Iligan ug Cagayan de Oro niadtong Biyernes sa gabii.

Sumala pa nga niadto pang Martes mipagawas og warning ang PDRRMC kabahin sa umaabot nga bagyo sumala pa ni Allen Cabaron, ang provincial coordinator sa OCD.

Ang PDRRMC pinangulohan ni Gov. Roel Degamo mipatawag og emergency meeting niadtong Disyembre 14 aron mapalig-on pa ang pagpangandam sa umaabot nga bagyo matud pa sa report.

Usa ka adlaw human sa pag-igo ni Sendong ang OCD ug ang Philippine Army 302nd Infantry Brigade mipasusi sa mga naapektahang lugar samtang gisugdan dayon ang relief operations kauban ang mga sakop sa Department of Social Welfare and Development (DSWD).

Ang Department of Health (DOH) nagsugod dayon sa pag-inspeksyon sa mga evacuation centers aron masiguro ang maayong panglawas sa mga evacuees.

Adunay 646 ka mga rescue groups ang mitabang sa maong operasyon sumala pa sa report ni provincial police director Edward Carranza ngadto sa council nga gilangkuban sa Negros Oriental Provincial Police Office, Dumaguete City Police Station, Provincial Public Safety Company, 348 Rescue Team, Red Cross, Bureau of Fire Protection, 302nd Brigade sa Philippine Army, rescue volunteers, barangay officials sa mga apektadong lugar. -RMN/PIA Negros Oriental ug Rachelle M. Nessia/EIM  (BANAT NEWS)