CEBU, Philippines - Gidepensahan ni Bise Mayor Joy Augustus Young ang pagtuli sa P500 milyon budget sa drainage system sa siyudad alang sa 2012 nga gihimo nalang sa konseho nga P240 milyones.
Nagkanayon si Young nga kung moreklamo gani si Mayor Michael Rama kinsa maoy nangusog niini aduna na siya’y giandam nga tubag.
Matud pa ni Young nga igo lang giaprobahan sa konseho kung unsay naa sa realidad nga estado sa siyudad apan bukas si Young nga himuon og P500 milyones pagbalik ang budget sa drainage system kini kun ang mayor motugot nga paubsan ang budget sa ubang proyekto aron itapak sa drainage.
“Kung moreklamo gani siya, usa raman akong matubag ana, show me the money, asa mana niya kuhaon?,” sumala pa sa bise mayor.
Nadawat na ni Mayor Rama niadtong Lunes ang council report sa budget alang sa 2012 kung diin moabot ngadto sa P5.2 Billion.
Ipatuon pa ni Rama ang maong report kung diin iyang gitahasan niini si City Administrator Jose Marie Poblete.
Kahinumduman nga nahimong isyu sa milabay nga buwan ang budget proposal ni Rama alang sa 2012 nga moabot ngadto sa P11.8 bilyones apan ang naaprobahan sa konseho P5.2 bilyones ra nga gihulagway sa mga konsehal sa siyudad nga mao kini ang “achievable” nga budget alang sa sunod tuig. (BANAT NEWS)