German namatay sa lodging house

CEBU, Philippines - Usa ka German national ang napalgang patay sulod sa lawak sa gipuy-an nga lodging house sa barangay Marigondon, dakbayan sa Lapulapu alas-12 pasado ang takna sa miaging tungang gabii.

Ang namatay mao si Ralfh Winter Kopeischk, 48, taga Germany ug temporaryong nagpuyo sa usa ka lodging house sa proper Marigondon sa maong dakbayan.

Si SPO1 Allan Amodia sa Homicide Section sa kapolisan sa maong dakbayan miingon nga ang hinigugma sa namatay nga si Tissie Almeda, 44, nga bag-ohay lang naabot maoy unang nakadiskubre niini ibabaw sa kama nga wala na magginhawa.

Ang mga sakop sa Emergency Rescue Unit Foundation (ERUF) nga miresponde mao nay midala niini sa usa ka pribadong tambalanan sa maong lugar apan gideklarar kini sa mga doktor nga dead on arrival.

Si Amodia miingon nga bisan kun wala sila makakita og mga timailhan nga adunay foul play sa kamatayon sa maong langyaw apan ila gihapon kining irekomendar nga maawtopsiya. (BANAT NEWS)