Mandaue wa mag-party motabang nalang

CEBU, Philippines - Wala mahinayon ang gikatakda untang Christmas party sa mga kawani sa kagamhanan sa dakbayan sa Mandaue human makahukom si Mayor Jonas Cortes nga ang salapi nga nagkantidad og P3 milyones nga gigahin alang unta sa galastohan niini ihatag na lamang nila ngadto sa biktima sa bagyong Sendong sa Cagayan de Oro City, Iligan ug Tanjay City sa Negros Oriental.

Si Roger Paller, tigpamaba ni Cortes nga nahinabi sa Banat News miingon nga gihatagan og katumanan ang maong tinguha ni Mayor Cortes dihang giaprobahan usab sa special session sa konseho ang maong resolusyon nga gipangamahanan ni Konsehal Diosdado.

Matud pa ni Paller nga gibahin sa maong mga lugar nga naigo sa bagyong Sendong ang maong kantidad nga naglakip sa P1.5 milyones alang sa Cagayan de Oro City ug laing katunga nga kantidad gibahin usab sa Tanjay City ug Iligan City nga P750,000 ang matag usa niini. Si Paller mipasabot nga gipili sa mayor sa dakbayan ang Tanjay City nga usa sa hatagan sa maong hinabang nga salapi sanglit sa kasamtangan padayon na nga giumol ang sisterhood agreement sa duha ka dakbayan.

Sumala pa nga hasta ang mga departamento sa city hall milusad og kaugalingong fund raising campaign pinaagi sa pagdonar aron itampo ngadto sa mga biktima nga naglakip sa salapi, mga linatang pagkaon, mga sapot ug uban pa.

“Adunay labing nanginahanglan nato nga mga kaigsuonang naigo sa katalagman sa Mindanao ug Negros Oriental. Kita dinhi sa Sugbo nga gipanalanginan sa Ginoo kay gilikay man niya, dugang pa ni Cortes. Angay lang pod nga mohimo og gamay nga sakripisyo nga imbes ang salapi nga atong ilipaylipay sa Christmas party ato na lang nga ihatag ngadto sa mga nanginahanglan nga biktima sa bagyo,” matud pa sa mayor.

Sa nasayran nga dul-an sa libo ka mga kinabuhi ang nakalas sa maong bagyo sa maong mga dapit nga nagdala og kusog nga ulan nga maoy mibanlas sa mga kabtangan ug mga lumolupyo nga mikalas og daghang kinabuhi ug daghan pa niini ang wala na igkita. (BANAT NEWS)