CEBU, Philippines - Usa ka 83-anyos nga biyudang tigpalit og mga alahas ang naangol human kini giyak-an ug gidunggab sa usa ka tulisan sulod sa lawak sa ilang panimalay sa bukirang bahin sa barangay Campirong barangay Pasol sa lungsod sa Alcoy niadtong miaging buntag.
Ang biktima mao si Juanita Belda, 83, nalandig sa tambalanan sa dakbayan sa Sugbu gumikan sa mga naangkong samad-samad sa kalawasan tungod sa pagduslakduslak kaniya sa tulisang si Jeylord Pingol, 27, taga barangay Obong sa lungsod sa Dalaguete.
Ang biktima nasalbar gikan sa tinong kamatayon tungod sa pagresponde sa anak sa biktima nga si Francisco Belda nga nakiglayog dayon sa tulisan ug dihang nalupig ang naulahi milayat kini sa bintana ug miikyas.
Matud ni SPO1 Nestor Bayang sa Alcoy Police Station dihang nahinabi sa Banat News si Juanita diha sa sulod sa iyang lawak samtang ang anak niini diha sa kusina nagdegamo sa ilang pamahaw.
Ang suspek matud pang Bayang kalit nga misulod sa balay ug milahos sa lawak sa tiguwang dayon gitulis kini. Apan ang biktima nagdumili sa paghatag ug nisiyagit nga nangayo og tabang hinungdan sa pagresponde sa anak niini.
Sumala pa nga naabtan pa sa anak ang suspek nga nidat-og ug nagpunay og dunggab sa inahan niini hinungdan nga gilayog kini ni Francisco apan nakabuhi ang tulisan ug milayat sa bintana.
Ang kapulisan pinangulohan ni PO3 Emilio Carunggay nga miresponde sa lugar mao nay mihatud sa biktima sa tambalanan sa Dalaguete apan gibalhin kini dayun sa tambalanan sa dakbayan sa Sugbo.
Nadakpan hinuon sa hot pursuit operation sa kapolisan sa lungsod sa Dalaguete ang suspek sa pinuy-anan sa barangay Obong, Dalaguete.
Ang kabanay sa biktima mipasangil nga nakuha ang brilyante nga ariyos sa tiguwang ug duna pay ubang mahalong alahas nga nahanaw.
Sumala pa nga niadtong milabay’ng semana mianha ang suspek sa tiguwang ug mihangyong paliton ang alahas sa tiguwang nga naibgan niini apan gibalibaran kini sa biktima. (/EIM)(BANAT NEWS)