Nagsuga lang og lighter napunggit sa sakyanan

CEBU, Philippines - Patay ang usa ka lay minister nga nagmaneho sa iyang motorsiklo nga padulong mosimba sa Misa de Gallo human nadasmagan sa gikasugat nga sakyanang giingong gipanag-iya sa munisipyo sa Asturias niadtong Lunes sa ala 1: 45 sa kaadlawon diha sa barangay Matab-ang sa dakbayan sa Toledo.

Si Wilfredo Quitinita, 45, molupyo sa sitio Buyo sa barangay Matab-ang ug usa ka lay minister nagmaneho sa iyang motorsiklo Honda Wave patay na pag-abot sa tambalanan tungod sa kadaot nga naangkon sa kalawasan niini.

Samtang ang nakadasmag sa biktima mao ang Nissan Frontier nagtangag sa plakang SJC-521 nga gimaneho ni Eleodoro Apas Jr., 35, taga barangay Vito sa lungsod sa Minglanilla.

Sa imbestigasyon sa traffic division sa Toledo City Police Station nga gipangulohan ni SPO2 Lorenzo Mahilum nagbutyag ang biktima padulong na sa simbahan sa Talavera aron moalagad sa Misa de Gallo dihang kini nadasmagan.

Dihang nagdagan ang motorsiklo sa biktima kalit lang napawong ang headlights sa motorsiklo niini pag-abot sa ngitngit nga lugar hinungdan nga ang giiwag nalang niini sa dalan mao ang gamay’ng flashlight sa iyang lighter.

Apan pag-abot sa nahitaboan napunggit kini sa maong sakyanan nga wala makabantay niadtong higayona sa gamay’ng siga sa lighter nga maoy gigamit nga iwag sa biktima.

Tungod sa kakusog sa pagkaigo sa biktima natagak ug nalagpot kini gikan sa iyang motorsiklo hinungdan nga maayong pagkapiyapi sa nawong niini.

Daling gitabang ang biktima ug gidala sa Toledo District Hospital apan si Dr. Arlene Perez mideklarar kaniya nga dead on arrival (DOA).

Human sa aksidente si Apas didto mitahan sa iyang kaugalingon sa Matab-ang Police precinct ug didto usab siya gi-detained.

Si SPO3 Allan Barquin nga gikahinabi sa Banat News sa telepono nagkanayon nga pabiling gi-detained ang drayber sa Frontier samtang gipaabot pa sab nila ang mga kabanay sa biktima nga mopasaka og kaso batok kang Apas. (BANAT NEWS)