Internet cafe girapido bata patay, 2 angol

CEBU, Philippines - Usa ang namatay ug duha ang naangol sa mga batan-ong lalaking nagduwa og computer game dihang kalit silang gipamusil sa nagtaptap og panapton nga duha ka lalaki ala-una pasado ang takna sa miaging kaadlawon sa dumpsite, sitio Soong, barangay Mactan, dakbayan sa Lapulapu.

Ang namatay mao si Armand Denso, 16, ug nangaangol mao ang usa ka17-anyos ug usa ka 8-anyos nga pulos nagpuyo sa maong dapit.

Si SPO1 Allan Amodia sa Homicide Section sa kapolisan sa maong dakbayan nga nahinabi sa Banat News miingon nga nagdula og computer ang tulo dihang kalit lang giablihan sa duha ka lalaki ang pultahan sa lawak nga nahimutangan sa mga computer nga gipanag-iya ni Lourdes Inot.

Matud pa ni Amodia ang duha ka lalaki pulos mga batan-on nga nagtaptap sa ilang mga nawong dayon kalit nga namusil sa mga bata hinungdan sa pagdinaganay sa mga tawo sa sulod.

Si Denso kinsa diha maglingkod duol sa pultahan maoy unang naigo makadaghang higayon sa iyang kalawasan ug dead on the spot kini.

Ang duha ka naangol nga nakadagan nakaangkon og samad pinusilan sa walang kamot ug sa tuong tiil ug gihatod sa Lapulapu City Hospital sa maong dakbayan.

Gituohan nga naglambigit kini sa panag-atbang sa gangs ang motibo sa maong krimen. (BANAT NEWS)