CEBU, Philippines - Gikanselar sa Police Regional Office (PRO-7) ang ilang gikatakda untang tradisyonal nga Christmas party karung adlawa ug gipili nilang ihatag nalang sa mga biktima sa bagyong Sendong ang ilang panggastos sa maong selebrasyon.
“ The leadership of Police Regional Office 7 decided to cancel its Christmas Party tomorrow opting to donate the budget to the victims of Typhoon Sendong instead,” matud pa sa pamahayag ni PRO-7 director Chief Supt. Marcelo Garbo Jr. sa gipadalang pamahayag dinhi sa Banat News.
Matud pa ni Garbo nga dili makaya sa ilang konsensiya nga maglipay-lipay samtang adunay mga tawo nga naa sa kalisdanan tungod sa nahitabong katalagman.
“We cannot in conscience celebrate and hold a Christmass Party, while thousands of our countrymen in Negros Oriental and Northern Mindanao are suffering in the aftermath of Typhoon Sendong,” matud pa ni Garbo. Samtang si Superintendent Benjamin Santos sa Regional Comptroller mibutyag nga ang budget sa ilang party karung tuiga ilang gamiton aron mamalit og mga panginahanglanon sa mga nabiktima sa nahisgutang bagyo.
Midugang si Santos nga ilang ipang-apod-apod unya ang ilang mga napalit ngadto sa Negros Oriental sa Central Visayas ug Cagayan De Oro City ug Iligan sa Mindanao.
Butyag usab ni Santos nga ang mga gikatakdang papremyo unta alang sa raffle sa party ila usab nga ilakip paghatag. Karung adlawa gikatakdang mobisita si Garbo sa syudad sa Dumaguete sa Negros Oriental nga labihan sad nga naigo sa maong bagyo kini aron magdala sa donasyon. (BANATNEWS)