Pinaskohan sa matag mayor P500 mil

CEBU, Philippines - Labing maatiman sa mga lider sa kalungsoran ang mga proyekto alang sa katawhan niining gisaad sa kagamhanan sa lalawigan nga hatagan sila og kuwarta aron igasto sa maong mga proyekto.

Ang saad gihimo ni Gobernador Gwendolyn Garcia ngadto sa mga mayor ug bise mayor nga mitambong sa General Assembly sa Cebu International Convention Center   sa miaging Biyernes.

Gisaad sa gobernador nga P500 mil ang iyang ihatag sa matag mayor, samtang sa bise mayor tag P250 mil usab.

Apan gimando sa gobernador nga kinahanglang idapat ang maong salapi sa mga nag-unang proyekto sa matag lungsod.

Si San Francisco Mayor Aly Arquillano miingon nga kining maong salapi dako na kaayo og mahimo sa iyang mga proyekto sa iyang lungsod ug sa tanang lungsod   sa tibuok probinsiya sa Sugbo.

Samtang si Alcoy Vice mayor Antonio Plando nagkanayon nga kasagaran sa mga proyekto sa iyang lungsod gigastohan sa salapi sa Kapitolyo pinaagi ni Gobernador Garcia. Hinuon ang gobernador miingon nga ang iyang administrasyon naanad na kaayong mohatag og ayuda ngadto sa mga lungsod nga mangayo og hinabang gikan sa Kapitolyo. (BANAT NEWS)