Talisay jail ipaubos sa red alert

CEBU, Philippines - Ang Bureau of Jail Management and Penology (BJMP) molusad og red alert sa ilang pagbantay sa mga piniriso sa Talisay City Jail (TCJ) ilabi na sa nagsingabot nga Pasko ug Bag-ong Tuig.

Si Chief Inspector Renante Rubio, jail warden sa TCJ nagkanayon nga wala sila’y kompiyansa karong mga  panahona tungod kay adunay posibilidad nga may mga piniriso nga maghuna-huna sa pag-ikyas aron makauban ang ilang pamilya.

Gibutyag ni Rubio nga sa Disyembre 24 ug 25, 2011 ug Disyembre 31, 2011 ug Enero 1, 2012 ilang ipaubos sa red alert status ang prisohan.

Hinuon sa maong mga adlaw “open house” sila diin ang pamilya sa mga binilanggo puweding makaduaw gikan sa alas 8:00 sa buntag hangtud sa alas 5:00 sa hapon.

Kahinumdoman nga mokabat na sa duha ka tuig dihang usa ka menor de edad nga piniriso nga may kasong pagpangawat   nakaikyas gikan sa TCJ ug nagtago-tago pa hangtud karon nga wala gyud hidakpi. Ang TCJ adunay 303 ka mga inmate nga miukopar sa pito ka mga cottage, diin 42 niini mga babaye ug 11 ang mga menor de edad nga kasagarang kaso mao ang pangawat, ginadiling drugas ug rape.

Si Rubio midugang nga matag cottage kasudlan og   40 ngadto sa 50 ka mga binilanggo. (WC)(BANAT NEWS)