CEBU, Philippines - Usa ka 15-anyos nga batang lalaki ang nasikop sa kapolisan human niya dunggaba ang ilang silingang hubog nga misagpa kaniya niadtong Sabado sa gabii diha sa sitio Bliss, barangay Labangon, dakbayan sa Sugbo.
Ang maong minor giingong midunggab sa buko-buko ni Arcadio “Ardie” Macasucol, 47-anyos dihang silang duha nangahubog alas-10 sa gabii sa nahisgutang lugar.
Sumala pa kalit nga gidibdiban sa biktima ang suspek ug tungod sa kasakit midagan kini paingon car repair shop nga gitrabahoan sa iyang amahan ug uyoan ug misumbong.
Human niini mipauli kini sa ilang balay ug nagkuha og kutsilyo ug gibalikan ang biktima ug walay pagduhaduha gihansakan niya kini sa buko-buko.
Si Masucol mikaratil og dagan ug nangayo og panabang ngadto sa iyang igsuon nga si Flordelisa ug sa bana niining si Michael Cataluna kinsa daling midala kaniya sa Cebu City Medical Center samtang ang menor gikuyogan kini sa iyang amahan sa pagtahan ngadto sa barangay hall. - Niña G. Sumacot sa The Freeman/EIM (BANAT NEWS)