9 mil drivers ug operators nakabenepisyo sa Pantawid Pasada cards

CEBU, Philippines - Mikabat na ngadto sa 80 porsiyento o 9,000 ka mga drayber sa mga pasaheroan ug operators sa Central Visayas ang nakadawat sa Pantawid Pasada Cards base sa natala niadtong Disyembre 15, 2011.

Ang Land Transportation Office (LTO)-7 regional director Raul Aguilos mibutyag nga sa 11,695 ka mga beneficiaries mga 9,000 na ang nakakuha sa Pantawid Pasada Cards.

Ang mga franchise holders sa public utility jeep (PUJ) kinsa dunay balidong registration apan wala pa makakuha sa ilang Pantawid Pasada Cards dili na mahimong makakuha niini diha sa rehiyonal ug sa mga sangang buhatan sa LTO adto na sila pweding makakuha sa buhatan sa Department of Energy.

Ang DOE nagkanayon nga ang Pantawid Pasada Card gihatag kining libre ngadto sa mga beneficiaries nga ang tumong sa gobiyerno mao nga dili kaayo mabug-atan sa pagtaas sa presyo sa gasolina ang mga drayber.

Ang nahisgutang card adunay P1,050 nga kantidad nga magamit sa pagbayad sa mga drayber inig magpatubil sa ilang gimanehong sakyanan.

Kahinumduman nga si Presidente Benigno Aquino III miluwat sa Executive Order No.32 o Pantawid Pasada Program isip fuel assistance ngadto sa mga drayber sa puj. (BANAT NEWS)